VULC ¹ [Audite verbum istud,
quod ego levo super vos planctum :
domus Israël cecidit,
et non adjiciet ut resurgat.

VULC ² Virgo Israël projecta est in terram suam,
non est qui suscitet eam.

VULC ³ Quia hæc dicit Dominus Deus :
Urbs de qua egrediebantur mille,
relinquentur in ea centum ;
et de qua egrediebantur centum,
relinquentur in ea decem in domo Israël.

VULC ⁴ Quia hæc dicit Dominus domui Israël :
Quærite me, et vivetis.

VULC ⁵ Et nolite quærere Bethel,
et in Galgalam nolite intrare,
et in Bersabee non transibitis,
quia Galgala captiva ducetur,
et Bethel erit inutilis.

VULC ⁶ Quærite Dominum, et vivite
(ne forte comburatur ut ignis domus Joseph, et devorabit,
et non erit qui extinguat Bethel :

VULC ⁷ qui convertitis in absinthium judicium,
et justitiam in terra relinquitis) :

VULC ⁸ facientem Arcturum et Orionem,
et convertentem in mane tenebras,
et diem in noctem mutantem ;
qui vocat aquas maris,
et effundit eas super faciem terræ ;
Dominus nomen est ejus :

VULC ⁹ qui subridet vastitatem super robustum,
et depopulationem super potentem affert.

VULC ¹⁰ Odio habuerunt corripientem in porta,
et loquentem perfecte abominati sunt.

VULC ¹¹ Idcirco, pro eo quod diripiebatis pauperem,
et prædam electam tollebatis ab eo,
domos quadro lapide ædificabitis,
et non habitabitis in eis ;
vineas plantabis amantissimas,
et non bibetis vinum earum.

VULC ¹² Quia cognovi multa scelera vestra,
et fortia peccata vestra :
hostes justi, accipientes munus,
et pauperes deprimentes in porta.

VULC ¹³ Ideo prudens in tempore illo tacebit,
quia tempus malum est.

VULC ¹⁴ Quærite bonum, et non malum, ut vivatis ;
et erit Dominus Deus exercituum vobiscum, sicut dixistis.

VULC ¹⁵ Odite malum et diligite bonum,
et constituite in porta judicium :
si forte misereatur Dominus Deus exercituum reliquiis Joseph.

VULC ¹⁶ Propterea hæc dicit Dominus Deus exercituum, dominator :
In omnibus plateis planctus ;
et in cunctis quæ foris sunt, dicetur : Væ, væ !
et vocabunt agricolam ad luctum,
et ad planctum eos qui sciunt plangere.

VULC ¹⁷ Et in omnibus vineis erit planctus,
quia pertransibo in medio tui,
dicit Dominus.]

VULC ¹⁸ [Væ desiderantibus diem Domini !
ad quid eam vobis ?
Dies Domini ista, tenebræ, et non lux.

VULC ¹⁹ Quomodo si fugiat vir a facie leonis,
et occurrat ei ursus ;
et ingrediatur domum, et innitatur manu sua super parietem,
et mordeat eum coluber.

VULC ²⁰ Numquid non tenebræ dies Domini, et non lux ;
et caligo, et non splendor in ea ?

VULC ²¹ Odi, et projeci festivitates vestras,
et non capiam odorem cœtuum vestrorum.

VULC ²² Quod si obtuleritis mihi holocautomata, et munera vestra,
non suscipiam ;
et vota pinguium vestrorum non respiciam.

VULC ²³ Aufer a me tumultum carminum tuorum ;
et cantica lyræ tuæ non audiam.

VULC ²⁴ Et revelabitur quasi aqua judicium,
et justitia quasi torrens fortis.

VULC ²⁵ Numquid hostias et sacrificium obtulistis mihi
in deserto quadraginta annis, domus Israël ?

VULC ²⁶ et portastis tabernaculum Moloch vestro,
et imaginem idolorum vestrorum, sidus dei vestri,
quæ fecistis vobis.

VULC ²⁷ Et migrare vos faciam trans Damascum, dicit Dominus :
Deus exercituum nomen ejus.]