VULC ¹ [Osculetur me osculo oris sui ;
quia meliora sunt ubera tua vino,

VULC ² fragrantia unguentis optimis.
Oleum effusum nomen tuum ;
ideo adolescentulæ dilexerunt te.

VULC ³ Trahe me, post te curremus
in odorem unguentorum tuorum.
Introduxit me rex in cellaria sua ;
exsultabimus et lætabimur in te,
memores uberum tuorum super vinum.
Recti diligunt te.

VULC ⁴ Nigra sum, sed formosa, filiæ Jerusalem,
sicut tabernacula Cedar, sicut pelles Salomonis.

VULC ⁵ Nolite me considerare quod fusca sim,
quia decoloravit me sol.
Filii matris meæ pugnaverunt contra me ;
posuerunt me custodem in vineis :
vineam meam non custodivi.

VULC ⁶ Indica mihi, quem diligit anima mea, ubi pascas,
ubi cubes in meridie,
ne vagari incipiam post greges sodalium tuorum.

VULC ⁷ Si ignoras te, o pulcherrima inter mulieres,
egredere, et abi post vestigia gregum,
et pasce hædos tuos juxta tabernacula pastorum.

VULC ⁸ Equitatui meo in curribus Pharaonis
assimilavi te, amica mea.

VULC ⁹ Pulchræ sunt genæ tuæ sicut turturis ;
collum tuum sicut monilia.

VULC ¹⁰ Murenulas aureas faciemus tibi,
vermiculatas argento.

VULC ¹¹ Dum esset rex in accubitu suo,
nardus mea dedit odorem suum.

VULC ¹² Fasciculus myrrhæ dilectus meus mihi ;
inter ubera mea commorabitur.

VULC ¹³ Botrus cypri dilectus meus mihi
in vineis Engaddi.

VULC ¹⁴ Ecce tu pulchra es, amica mea ! ecce tu pulchra es !
Oculi tui columbarum.

VULC ¹⁵ Ecce tu pulcher es, dilecte mi, et decorus !
Lectulus noster floridus.

VULC ¹⁶ Tigna domorum nostrarum cedrina,
laquearia nostra cypressina.]