VULC ¹ [Quid videbis in Sulamite, nisi choros castrorum ?
Quam pulchri sunt gressus tui in calceamentis, filia principis !
Juncturæ femorum tuorum sicut monilia
quæ fabricata sunt manu artificis.

VULC ² Umbilicus tuus crater tornatilis,
numquam indigens poculis.
Venter tuus sicut acervus tritici vallatus liliis.

VULC ³ Duo ubera tua sicut duo hinnuli,
gemelli capreæ.

VULC ⁴ Collum tuum sicut turris eburnea ;
oculi tui sicut piscinæ in Hesebon
quæ sunt in porta filiæ multitudinis.
Nasus tuus sicut turris Libani,
quæ respicit contra Damascum.

VULC ⁵ Caput tuum ut Carmelus ;
et comæ capitis tui sicut purpura regis
vincta canalibus.

VULC ⁶ Quam pulchra es, et quam decora,
carissima, in deliciis !

VULC ⁷ Statura tua assimilata est palmæ,
et ubera tua botris.

VULC ⁸ Dixi : Ascendam in palmam,
et apprehendam fructus ejus ;
et erunt ubera tua sicut botri vineæ,
et odor oris tui sicut malorum.

VULC ⁹ Guttur tuum sicut vinum optimum,
dignum dilecto meo ad potandum,
labiisque et dentibus illius ad ruminandum.

VULC ¹⁰ Ego dilecto meo,
et ad me conversio ejus.

VULC ¹¹ Veni, dilecte mi, egrediamur in agrum,
commoremur in villis.

VULC ¹² Mane surgamus ad vineas :
videamus si floruit vinea,
si flores fructus parturiunt,
si floruerunt mala punica ;
ibi dabo tibi ubera mea.

VULC ¹³ Mandragoræ dederunt odorem
in portis nostris omnia poma :
nova et vetera, dilecte mi, servavi tibi.]