VULC ¹ [Væ qui condunt leges iniquas,
et scribentes injustitiam scripserunt,

VULC ² ut opprimerent in judicio pauperes,
et vim facerent causæ humilium populi mei ;
ut essent viduæ præda eorum,
et pupillos diriperent.

VULC ³ Quid facietis in die visitationis,
et calamitatis de longe venientis ?
ad cujus confugietis auxilium ?
et ubi derelinquetis gloriam vestram,

VULC ⁴ ne incurvemini sub vinculo,
et cum interfectis cadatis ?
Super omnibus his non est aversus furor ejus,
sed adhuc manus ejus extenta.]

VULC ⁵ [Væ Assur ! virga furoris mei et baculus ipse est ;
in manu eorum indignatio mea.

VULC ⁶ Ad gentem fallacem mittam eum,
et contra populum furoris mei mandabo illi,
ut auferat spolia, et diripiat prædam,
et ponat illum in conculcationem quasi lutum platearum.

VULC ⁷ Ipse autem non sic arbitrabitur,
et cor ejus non ita existimabit ;
sed ad conterendum erit cor ejus,
et ad internecionem gentium non paucarum.

VULC ⁸ Dicet enim :

VULC ⁹ Numquid non principes mei simul reges sunt ?
numquid non ut Charcamis, sic Calano ?
et ut Arphad, sic Emath ?
numquid non ut Damascus, sic Samaria ?

VULC ¹⁰ Quomodo invenit manus mea regna idoli,
sic et simulacra eorum de Jerusalem et de Samaria.

VULC ¹¹ Numquid non sicut feci Samariæ et idolis ejus,
sic faciam Jerusalem et simulacris ejus ?

VULC ¹² Et erit, cum impleverit Dominus
cuncta opera sua
in monte Sion et in Jerusalem,
visitabo super fructum magnifici cordis regis Assur,
et super gloriam altitudinis oculorum ejus.

VULC ¹³ Dixit enim : In fortitudine manus meæ feci,
et in sapientia mea intellexi ;
et abstuli terminos populorum,
et principes eorum deprædatus sum,
et detraxi quasi potens in sublimi residentes.

VULC ¹⁴ Et invenit quasi nidum manus mea
fortitudinem populorum ;
et sicut colliguntur ova quæ derelicta sunt,
sic universam terram ego congregavi ;
et non fuit qui moveret pennam,
et aperiret os, et ganniret.

VULC ¹⁵ Numquid gloriabitur securis contra eum qui secat in ea ?
aut exaltabitur serra contra eum a quo trahitur ?
Quomodo si elevetur virga contra elevantem se,
et exaltetur baculus, qui utique lignum est.

VULC ¹⁶ Propter hoc mittet Dominator, Dominus exercituum,
in pinguibus ejus tenuitatem ;
et subtus gloriam ejus succensa ardebit
quasi combustio ignis.

VULC ¹⁷ Et erit lumen Israël in igne,
et Sanctus ejus in flamma ;
et succendetur, et devorabitur
spina ejus et vepres in die una.

VULC ¹⁸ Et gloria saltus ejus, et carmeli ejus,
ab anima usque ad carnem consumetur ;
et erit terrore profugus.

VULC ¹⁹ Et reliquiæ ligni saltus ejus præ paucitate numerabuntur,
et puer scribet eos.]

VULC ²⁰ [Et erit in die illa :
non adjiciet residuum Israël,
et hi qui fugerint de domo Jacob,
inniti super eo qui percutit eos ;
sed innitetur super Dominum,
Sanctum Israël, in veritate.

VULC ²¹ Reliquiæ convertentur ; reliquiæ, inquam, Jacob
ad Deum fortem.

VULC ²² Si enim fuerit populus tuus, Israël, quasi arena maris,
reliquiæ convertentur ex eo ;
consummatio abbreviata
inundabit justitiam.

VULC ²³ Consummationem enim et abbreviationem
Dominus Deus exercituum faciet in medio omnis terræ.

VULC ²⁴ Propter hoc, hæc dicit Dominus Deus exercituum :
Noli timere, populus meus,
habitator Sion, ab Assur :
in virga percutiet te,
et baculum suum levabit super te,
in via Ægypti.

VULC ²⁵ Adhuc enim paululum modicumque,
et consummabitur indignatio
et furor meus super scelus eorum.

VULC ²⁶ Et suscitabit super eum Dominus exercituum flagellum,
juxta plagam Madian in petra Oreb :
et virgam suam super mare,
et levabit eam in via Ægypti.

VULC ²⁷ Et erit in die illa :
auferetur onus ejus de humero tuo
et jugum ejus de collo tuo,
et computrescet jugum a facie olei.]

VULC ²⁸ [Veniet in Ajath, transibit in Magron,
apud Machmas commendabit vasa sua.

VULC ²⁹ Transierunt cursim,
Gaba sedes nostra ;
obstupuit Rama,
Gabaath Saulis fugit.

VULC ³⁰ Hinni voce tua, filia Gallim,
attende Laisa, paupercula Anathoth.

VULC ³¹ Migravit Medemena ;
habitatores Gabim, confortamini.

VULC ³² Adhuc dies est ut in Nobe stetur ;
agitabit manum suam super montem filiæ Sion,
collem Jerusalem.

VULC ³³ Ecce Dominator, Dominus exercituum,
confringet lagunculam in terrore ;
et excelsi statura succidentur,
et sublimes humiliabuntur.

VULC ³⁴ Et subvertentur condensa saltus ferro ;
et Libanus cum excelsis cadet.]