VULC ¹ Onus Babylonis, quod vidit Isaias, filius Amos.

VULC ² [Super montem caliginosum levate signum :
exaltate vocem,
levate manum,
et ingrediantur portas duces.

VULC ³ Ego mandavi sanctificatis meis,
et vocavi fortes meos in ira mea,
exsultantes in gloria mea.

VULC ⁴ Vox multitudinis in montibus,
quasi populorum frequentium ;
vox sonitus regum,
gentium congregatarum.
Dominus exercituum præcepit
militiæ belli,

VULC ⁵ venientibus de terra procul,
a summitate cæli ;
Dominus, et vasa furoris ejus,
ut disperdat omnem terram.

VULC ⁶ Ululate, quia prope est dies Domini ;
quasi vastitas a Domino veniet.

VULC ⁷ Propter hoc omnes manus dissolventur,
et omne cor hominis contabescet,

VULC ⁸ et conteretur.
Torsiones et dolores tenebunt ;
quasi parturiens dolebunt :
unusquisque ad proximum suum stupebit,
facies combustæ vultus eorum.

VULC ⁹ Ecce dies Domini veniet,
crudelis, et indignationis plenus, et iræ, furorisque,
ad ponendam terram in solitudinem,
et peccatores ejus conterendos de ea.

VULC ¹⁰ Quoniam stellæ cæli, et splendor earum,
non expandent lumen suum ;
obtenebratus est sol in ortu suo,
et luna non splendebit in lumine suo.

VULC ¹¹ Et visitabo super orbis mala,
et contra impios iniquitatem eorum ;
et quiescere faciam superbiam infidelium,
et arrogantiam fortium humiliabo.

VULC ¹² Pretiosior erit vir auro,
et homo mundo obrizo.

VULC ¹³ Super hoc cælum turbabo ;
et movebitur terra de loco suo,
propter indignationem Domini exercituum,
et propter diem iræ furoris ejus.

VULC ¹⁴ Et erit quasi damula fugiens,
et quasi ovis, et non erit qui congreget.
Unusquisque ad populum suum convertetur,
et singuli ad terram suam fugient.

VULC ¹⁵ Omnis qui inventus fuerit occidetur,
et omnis qui supervenerit cadet in gladio ;

VULC ¹⁶ infantes eorum allidentur in oculis eorum,
diripientur domus eorum, et uxores eorum violabuntur.

VULC ¹⁷ Ecce ego suscitabo super eos Medos,
qui argentum non quærant,
nec aurum velint ;

VULC ¹⁸ sed sagittis parvulos interficient,
et lactantibus uteris non miserebuntur,
et super filios non parcet oculus eorum.

VULC ¹⁹ Et erit Babylon illa gloriosa in regnis,
inclyta superbia Chaldæorum,
sicut subvertit Dominus Sodomam et Gomorrham.

VULC ²⁰ Non habitabitur usque in finem,
et non fundabitur usque ad generationem et generationem ;
nec ponet ibi tentoria Arabs,
nec pastores requiescent ibi.

VULC ²¹ Sed requiescent ibi bestiæ,
et replebuntur domus eorum draconibus,
et habitabunt ibi struthiones,
et pilosi saltabunt ibi ;

VULC ²² et respondebunt ibi ululæ in ædibus ejus,
et sirenes in delubris voluptatis.]