VULC ¹ Verbum quod vidit Isaias, filius Amos, super Juda et Jerusalem.

VULC ² [Et erit in novissimis diebus :
præparatus mons domus Domini
in vertice montium,
et elevabitur super colles ;
et fluent ad eum omnes gentes,

VULC ³ et ibunt populi multi, et dicent :
Venite, et ascendamus ad montem Domini,
et ad domum Dei Jacob ;
et docebit nos vias suas,
et ambulabimus in semitis ejus,
quia de Sion exibit lex,
et verbum Domini de Jerusalem.

VULC ⁴ Et judicabit gentes,
et arguet populos multos ;
et conflabunt gladios suos in vomeres,
et lanceas suas in falces.
Non levabit gens contra gentem gladium,
nec exercebuntur ultra ad prælium.

VULC ⁵ Domus Jacob, venite,
et ambulemus in lumine Domini.]

VULC ⁶ [Projecisti enim populum tuum,
domum Jacob,
quia repleti sunt ut olim,
et augeres habuerunt ut Philisthiim,
et pueris alienis adhæserunt.

VULC ⁷ Repleta est terra argento et auro,
et non est finis thesaurorum ejus.

VULC ⁸ Et repleta est terra ejus equis,
et innumerabiles quadrigæ ejus.
Et repleta est terra ejus idolis ;
opus manuum suarum adoraverunt,
quod fecerunt digiti eorum.

VULC ⁹ Et incurvavit se homo,
et humiliatus est vir ;
ne ergo dimittas eis.

VULC ¹⁰ Ingredere in petram, et abscondere in fossa humo
a facie timoris Domini, et a gloria majestatis ejus.

VULC ¹¹ Oculi sublimes hominis humiliati sunt,
et incurvabitur altitudo virorum ;
exaltabitur autem Dominus solus
in die illa.

VULC ¹² Quia dies Domini exercituum
super omnem superbum, et excelsum,
et super omnem arrogantem,
et humiliabitur ;

VULC ¹³ et super omnes cedros Libani sublimes et erectas,
et super omnes quercus Basan,

VULC ¹⁴ et super omnes montes excelsos,
et super omnes colles elevatos,

VULC ¹⁵ et super omnem turrim excelsam,
et super omnem murum munitum,

VULC ¹⁶ et super omnes naves Tharsis,
et super omne quod visu pulchrum est,

VULC ¹⁷ et incurvabitur sublimitas hominum,
et humiliabitur altitudo virorum,
et elevabitur Dominus solus
in die illa ;

VULC ¹⁸ et idola penitus conterentur ;

VULC ¹⁹ et introibunt in speluncas petrarum,
et in voragines terræ,
a facie formidinis Domini
et a gloria majestatis ejus,
cum surrexerit percutere terram.

VULC ²⁰ In die illa projiciet homo
idola argenti sui, et simulacra auri sui,
quæ fecerat sibi ut adoraret,
talpas et vespertiliones.

VULC ²¹ Et ingredietur scissuras petrarum
et in cavernas saxorum,
a facie formidinis Domini,
et a gloria majestatis ejus,
cum surrexerit percutere terram.

VULC ²² Quiescite ergo ab homine,
cujus spiritus in naribus ejus est,
quia excelsus reputatus est ipse.]