VULC ¹ [Ecce Dominus dissipabit terram :
et nudabit eam, et affliget faciem ejus,
et disperget habitatores ejus.

VULC ² Et erit sicut populus, sic sacerdos ;
et sicut servus, sic dominus ejus ;
sicut ancilla, sic domina ejus ;
sicut emens, sic ille qui vendit ;
sicut fœnerator, sic is qui mutuum accipit ;
sicut qui repetit, sic qui debet.

VULC ³ Dissipatione dissipabitur terra, et direptione prædabitur ;
Dominus enim locutus est verbum hoc.

VULC ⁴ Luxit, et defluxit terra, et infirmata est ;
defluxit orbis,
infirmata est altitudo populi terræ.

VULC ⁵ Et terra infecta est ab habitatoribus suis,
quia transgressi sunt leges,
mutaverunt jus,
dissipaverunt fœdus sempiternum.

VULC ⁶ Propter hoc maledictio vorabit terram,
et peccabunt habitatores ejus ;
ideoque insanient cultores ejus,
et relinquentur homines pauci.

VULC ⁷ Luxit vindemia, infirmata est vitis,
ingemuerunt omnes qui lætabantur corde ;

VULC ⁸ cessavit gaudium tympanorum,
quievit sonitus lætantium,
conticuit dulcedo citharæ.

VULC ⁹ Cum cantico non bibent vinum ;
amara erit potio bibentibus illam.

VULC ¹⁰ Attrita est civitas vanitatis,
clausa est omnis domus, nullo introëunte.

VULC ¹¹ Clamor erit super vino in plateis,
deserta est omnia lætitia,
translatum est gaudium terræ.

VULC ¹² Relicta est in urbe solitudo,
et calamitas opprimet portas.

VULC ¹³ Quia hæc erunt in medio terræ
in medio populorum,
quomodo si paucæ olivæ quæ remanserunt
excutiantur ex olea et racemi,
cum fuerit finita vindemia.]

VULC ¹⁴ [Hi levabunt vocem suam, atque laudabunt :
cum glorificatus fuerit Dominus, hinnient de mari.

VULC ¹⁵ Propter hoc in doctrinis glorificate Dominum ;
in insulis maris
nomen Domini Dei Israël.

VULC ¹⁶ A finibus terræ laudes audivimus,
gloriam Justi.
Et dixi : Secretum meum mihi,
secretum meum mihi.
Væ mihi !
prævaricantes prævaricati sunt,
et prævaricatione transgressorum prævaricati sunt.

VULC ¹⁷ Formido, et fovea, et laqueus
super te, qui habitator es terræ.

VULC ¹⁸ Et erit : qui fugerit a voce formidinis cadet in foveam ;
et qui se explicaverit de fovea tenebitur laqueo ;
quia cataractæ de excelsis apertæ sunt
et concutientur fundamenta terræ.

VULC ¹⁹ Confractione confringetur terra,
contritione conteretur terra,
commotione commovebitur terra ;

VULC ²⁰ agitatione agitabitur terra sicut ebrius,
et auferetur quasi tabernaculum unius noctis ;
et gravabit eam iniquitas sua,
et corruet, et non adjiciet ut resurgat.

VULC ²¹ Et erit : in die illa visitabit Dominus
super militiam cæli in excelso,
et super reges terræ qui sunt super terram ;

VULC ²² et congregabuntur in congregatione unius fascis in lacum,
et claudentur ibi in carcere,
et post multos dies visitabuntur.

VULC ²³ Et erubescet luna, et confundetur sol,
cum regnaverit Dominus exercituum
in monte Sion et in Jerusalem
et in conspectu senum suorum fuerit glorificatus.]