VULC ¹ In diebus illis ægrotavit Ezechias usque ad mortem ; et introivit ad eum Isaias, filius Amos, propheta, et dixit ei : Hæc dicit Dominus : Dispone domui tuæ, quia morieris tu, et non vives.

VULC ² Et convertit Ezechias faciem suam ad parietem, et oravit ad Dominum,

VULC ³ et dixit : Obsecro, Domine, memento, quæso, quomodo ambulaverim coram te in veritate et in corde perfecto, et quod bonum est in oculis tuis fecerim. Et flevit Ezechias fletu magno.

VULC ⁴ Et factum est verbum Domini ad Isaiam, dicens :

VULC ⁵ Vade, et dic Ezechiæ : Hæc dicit Dominus Deus David patris tui : Audivi orationem tuam, et vidi lacrimas tuas ; ecce ego adjiciam super dies tuos quindecim annos,

VULC ⁶ et de manu regis Assyriorum eruam te, et civitatem istam, et protegam eam.

VULC ⁷ Hoc autem tibi erit signum a Domino, quia faciet Dominus verbum hoc quod locutus est :

VULC ⁸ ecce ego reverti faciam umbram linearum per quas descenderat in horologio Achaz in sole, retrorsum decem lineis. Et reversus est sol decem lineis per gradus quos descenderat.

VULC ⁹ Scriptura Ezechiæ, regis Juda, cum ægrotasset et convaluisset de infirmitate sua.

VULC ¹⁰ [Ego dixi in dimidio dierum meorum :
Vadam ad portas inferi ;
quæsivi residuum annorum meorum.

VULC ¹¹ Dixi : Non videbo Dominum Deum
in terra viventium ;
non aspiciam hominem ultra,
et habitatorem quietis.

VULC ¹² Generatio mea ablata est, et convoluta est a me,
quasi tabernaculum pastorum.
Præcisa est velut a texente vita mea ;
dum adhuc ordirer, succidit me :
de mane usque ad vesperam finies me.

VULC ¹³ Sperabam usque ad mane ;
quasi leo, sic contrivit omnia ossa mea :
de mane usque ad vesperam finies me.

VULC ¹⁴ Sicut pullus hirundinis, sic clamabo ;
meditabor ut columba.
Attenuati sunt oculi mei, suspicientes in excelsum.
Domine, vim patior : responde pro me.

VULC ¹⁵ Quid dicam, aut quid respondebit mihi,
cum ipse fecerit ?
Recogitabo tibi omnes annos meos
in amaritudine animæ meæ.

VULC ¹⁶ Domine, si sic vivitur,
et in talibus vita spiritus mei,
corripies me, et vivificabis me.

VULC ¹⁷ Ecce in pace amaritudo mea amarissima.
Tu autem eruisti animam meam
ut non periret ;
projecisti post tergum tuum
omnia peccata mea.

VULC ¹⁸ Quia non infernus confitebitur tibi,
neque mors laudabit te :
non exspectabunt qui descendunt in lacum
veritatem tuam.

VULC ¹⁹ Vivens, vivens ipse confitebitur tibi,
sicut et ego hodie ;
pater filiis notam faciet
veritatem tuam.

VULC ²⁰ Domine, salvum me fac !
et psalmos nostros cantabimus
cunctis diebus vitæ nostræ
in domo Domini.]

VULC ²¹ Et jussit Isaias ut tollerent massam de ficis, et cataplasmarent super vulnus, et sanaretur.

VULC ²² Et dixit Ezechias : Quod erit signum quia ascendam in domum Domini ?