VULC ¹ [Confractus est Bel, contritus est Nabo ;
facta sunt simulacra eorum bestiis et jumentis,
onera vestra gravi pondere
usque ad lassitudinem.

VULC ² Contabuerunt, et contrita sunt simul ;
non potuerunt salvare portantem,
et anima eorum in captivitatem ibit.

VULC ³ Audite me, domus Jacob,
et omne residuum domus Israël ;
qui portamini a meo utero,
qui gestamini a mea vulva.

VULC ⁴ Usque ad senectam ego ipse,
et usque ad canos ego portabo ;
ego feci, et ego feram ;
ego portabo, et salvabo.

VULC ⁵ Cui assimilastis me, et adæquastis,
et comparastis me, et fecistis similem ?

VULC ⁶ Qui confertis aurum de sacculo,
et argentum statera ponderatis,
conducentes aurificem ut faciat deum,
et procidunt, et adorant.

VULC ⁷ Portant illum in humeris gestantes,
et ponentes in loco suo,
et stabit, ac de loco suo non movebitur :
sed et cum clamaverint ad eum, non audiet ;
de tribulatione non salvabit eos.

VULC ⁸ Mementote istud, et confundamini ;
redite, prævaricatores, ad cor.

VULC ⁹ Recordamini prioris sæculi,
quoniam ego sum Deus, et non est ultra deus,
nec est similis mei.

VULC ¹⁰ Annuntians ab exordio novissimum,
et ab initio quæ necdum facta sunt,
dicens : Consilium meum stabit,
et omnis voluntas mea fiet.

VULC ¹¹ Vocans ab oriente avem,
et de terra longinqua virum voluntatis meæ :
et locutus sum, et adducam illud ;
creavi et faciam illud.

VULC ¹² Audite me, duro corde,
qui longe estis a justitia.

VULC ¹³ Prope feci justitiam meam, non elongabitur,
et salus mea non morabitur.
Dabo in Sion salutem,
et in Israël gloriam meam.]