VULC ¹ Respondens autem Job, dixit :

VULC ² [Ergo vos estis soli homines,
et vobiscum morietur sapientia ?

VULC ³ Et mihi est cor sicut et vobis, nec inferior vestri sum ;
quis enim hæc quæ nostis ignorat ?

VULC ⁴ Qui deridetur ab amico suo, sicut ego,
invocabit Deum, et exaudiet eum :
deridetur enim justi simplicitas.

VULC ⁵ Lampas contempta apud cogitationes divitum
parata ad tempus statutum.

VULC ⁶ Abundant tabernacula prædonum,
et audacter provocant Deum,
cum ipse dederit omnia in manus eorum.

VULC ⁷ Nimirum interroga jumenta, et docebunt te ;
et volatilia cæli, et indicabunt tibi.

VULC ⁸ Loquere terræ, et respondebit tibi,
et narrabunt pisces maris.

VULC ⁹ Quis ignorat quod omnia hæc manus Domini fecerit ?

VULC ¹⁰ In cujus manu anima omnis viventis,
et spiritus universæ carnis hominis.

VULC ¹¹ Nonne auris verba dijudicat ?
et fauces comedentis, saporem ?

VULC ¹² In antiquis est sapientia,
et in multo tempore prudentia.

VULC ¹³ Apud ipsum est sapientia et fortitudo ;
ipse habet consilium et intelligentiam.

VULC ¹⁴ Si destruxerit, nemo est qui ædificet ;
si incluserit hominem, nullus est qui aperiat.

VULC ¹⁵ Si continuerit aquas, omnia siccabuntur ;
et si emiserit eas, subvertent terram.

VULC ¹⁶ Apud ipsum est fortitudo et sapientia ;
ipse novit et decipientem, et eum qui decipitur.

VULC ¹⁷ Adducit consiliarios in stultum finem,
et judices in stuporem.

VULC ¹⁸ Balteum regum dissolvit,
et præcingit fune renes eorum.

VULC ¹⁹ Ducit sacerdotes inglorios,
et optimates supplantat :

VULC ²⁰ commutans labium veracium,
et doctrinam senum auferens.

VULC ²¹ Effundit despectionem super principes,
eos qui oppressi fuerant relevans.

VULC ²² Qui revelat profunda de tenebris,
et producit in lucem umbram mortis.

VULC ²³ Qui multiplicat gentes, et perdit eas,
et subversas in integrum restituit.

VULC ²⁴ Qui immutat cor principum populi terræ,
et decipit eos ut frustra incedant per invium :

VULC ²⁵ palpabunt quasi in tenebris, et non in luce,
et errare eos faciet quasi ebrios.]