VULC ¹ Respondens autem Eliphaz Themanites, dixit :

VULC ² [Numquid sapiens respondebit quasi in ventum loquens,
et implebit ardore stomachum suum ?

VULC ³ Arguis verbis eum qui non est æqualis tibi,
et loqueris quod tibi non expedit.

VULC ⁴ Quantum in te est, evacuasti timorem,
et tulisti preces coram Deo.

VULC ⁵ Docuit enim iniquitas tua os tuum,
et imitaris linguam blasphemantium.

VULC ⁶ Condemnabit te os tuum, et non ego :
et labia tua respondebunt tibi.

VULC ⁷ Numquid primus homo tu natus es,
et ante colles formatus ?

VULC ⁸ numquid consilium Dei audisti,
et inferior te erit ejus sapientia ?

VULC ⁹ Quid nosti quod ignoremus ?
quid intelligis quod nesciamus ?

VULC ¹⁰ Et senes et antiqui sunt in nobis,
multo vetustiores quam patres tui.

VULC ¹¹ Numquid grande est ut consoletur te Deus ?
sed verba tua prava hoc prohibent.

VULC ¹² Quid te elevat cor tuum,
et quasi magna cogitans attonitos habes oculos ?

VULC ¹³ Quid tumet contra Deum spiritus tuus,
ut proferas de ore tuo hujuscemodi sermones ?

VULC ¹⁴ Quid est homo ut immaculatus sit,
et ut justus appareat natus de muliere ?

VULC ¹⁵ Ecce inter sanctos ejus nemo immutabilis,
et cæli non sunt mundi in conspectu ejus.

VULC ¹⁶ Quanto magis abominabilis et inutilis homo,
qui bibit quasi aquam iniquitatem ?

VULC ¹⁷ Ostendam tibi : audi me :
quod vidi, narrabo tibi.

VULC ¹⁸ Sapientes confitentur,
et non abscondunt patres suos :

VULC ¹⁹ quibus solis data est terra,
et non transivit alienus per eos.

VULC ²⁰ Cunctis diebus suis impius superbit,
et numerus annorum incertus est tyrannidis ejus.

VULC ²¹ Sonitus terroris semper in auribus illius :
et cum pax sit, ille semper insidias suspicatur.

VULC ²² Non credit quod reverti possit de tenebris ad lucem,
circumspectans undique gladium.

VULC ²³ Cum se moverit ad quærendum panem,
novit quod paratus sit in manu ejus tenebrarum dies.

VULC ²⁴ Terrebit eum tribulatio,
et angustia vallabit eum,
sicut regem qui præparatur ad prælium.

VULC ²⁵ Tetendit enim adversus Deum manum suam,
et contra Omnipotentem roboratus est.

VULC ²⁶ Cucurrit adversus eum erecto collo,
et pingui cervice armatus est.

VULC ²⁷ Operuit faciem ejus crassitudo,
et de lateribus ejus arvina dependet.

VULC ²⁸ Habitavit in civitatibus desolatis,
et in domibus desertis, quæ in tumulos sunt redactæ.

VULC ²⁹ Non ditabitur, nec perseverabit substantia ejus,
nec mittet in terra radicem suam.

VULC ³⁰ Non recedet de tenebris :
ramos ejus arefaciet flamma,
et auferetur spiritu oris sui.

VULC ³¹ Non credet, frustra errore deceptus,
quod aliquo pretio redimendus sit.

VULC ³² Antequam dies ejus impleantur peribit,
et manus ejus arescent.

VULC ³³ Lædetur quasi vinea in primo flore botrus ejus,
et quasi oliva projiciens florem suum.

VULC ³⁴ Congregatio enim hypocritæ sterilis,
et ignis devorabit tabernacula eorum qui munera libenter accipiunt.

VULC ³⁵ Concepit dolorem, et peperit iniquitatem,
et uterus ejus præparat dolos.]