VULC ¹ Respondens autem Sophar Naamathites, dixit :

VULC ² [Idcirco cogitationes meæ variæ succedunt sibi,
et mens in diversa rapitur.

VULC ³ Doctrinam qua me arguis audiam,
et spiritus intelligentiæ meæ respondebit mihi.

VULC ⁴ Hoc scio a principio,
ex quo positus est homo super terram,

VULC ⁵ quod laus impiorum brevis sit,
et gaudium hypocritæ ad instar puncti.

VULC ⁶ Si ascenderit usque ad cælum superbia ejus,
et caput ejus nubes tetigerit,

VULC ⁷ quasi sterquilinium in fine perdetur,
et qui eum viderant, dicent : Ubi est ?

VULC ⁸ Velut somnium avolans non invenietur :
transiet sicut visio nocturna.

VULC ⁹ Oculus qui eum viderat non videbit,
neque ultra intuebitur eum locus suus.

VULC ¹⁰ Filii ejus atterentur egestate,
et manus illius reddent ei dolorem suum.

VULC ¹¹ Ossa ejus implebuntur vitiis adolescentiæ ejus,
et cum eo in pulvere dormient.

VULC ¹² Cum enim dulce fuerit in ore ejus malum,
abscondet illud sub lingua sua.

VULC ¹³ Parcet illi, et non derelinquet illud,
et celabit in gutture suo.

VULC ¹⁴ Panis ejus in utero illius
vertetur in fel aspidum intrinsecus.

VULC ¹⁵ Divitias quas devoravit evomet,
et de ventre illius extrahet eas Deus.

VULC ¹⁶ Caput aspidum suget,
et occidet eum lingua viperæ.

VULC ¹⁷ (Non videat rivulos fluminis,
torrentes mellis et butyri.)

VULC ¹⁸ Luet quæ fecit omnia, nec tamen consumetur :
juxta multitudinem adinventionum suarum, sic et sustinebit.

VULC ¹⁹ Quoniam confringens nudavit pauperes :
domum rapuit, et non ædificavit eam.

VULC ²⁰ Nec est satiatus venter ejus :
et cum habuerit quæ concupierat, possidere non poterit.

VULC ²¹ Non remansit de cibo ejus,
et propterea nihil permanebit de bonis ejus.

VULC ²² Cum satiatus fuerit, arctabitur :
æstuabit, et omnis dolor irruet super eum.

VULC ²³ Utinam impleatur venter ejus,
ut emittat in eum iram furoris sui,
et pluat super illum bellum suum.

VULC ²⁴ Fugiet arma ferrea,
et irruet in arcum æreum.

VULC ²⁵ Eductus, et egrediens de vagina sua,
et fulgurans in amaritudine sua :
vadent et venient super eum horribiles.

VULC ²⁶ Omnes tenebræ absconditæ sunt in occultis ejus ;
devorabit eum ignis qui non succenditur :
affligetur relictus in tabernaculo suo.

VULC ²⁷ Revelabunt cæli iniquitatem ejus,
et terra consurget adversus eum.

VULC ²⁸ Apertum erit germen domus illius :
detrahetur in die furoris Dei.

VULC ²⁹ Hæc est pars hominis impii a Deo,
et hæreditas verborum ejus a Domino.]