VULC ¹ Respondens autem Job, dixit :

VULC ² [Audite, quæso, sermones meos,
et agite pœnitentiam.

VULC ³ Sustinete me, et ego loquar :
et post mea, si videbitur, verba, ridete.

VULC ⁴ Numquid contra hominem disputatio mea est,
ut merito non debeam contristari ?

VULC ⁵ Attendite me et obstupescite,
et superponite digitum ori vestro.

VULC ⁶ Et ego, quando recordatus fuero, pertimesco,
et concutit carnem meam tremor.

VULC ⁷ Quare ergo impii vivunt,
sublevati sunt, confortatique divitiis ?

VULC ⁸ Semen eorum permanet coram eis :
propinquorum turba et nepotum in conspectu eorum.

VULC ⁹ Domus eorum securæ sunt et pacatæ,
et non est virga Dei super illos.

VULC ¹⁰ Bos eorum concepit, et non abortivit :
vacca peperit, et non est privata fœtu suo.

VULC ¹¹ Egrediuntur quasi greges parvuli eorum,
et infantes eorum exsultant lusibus.

VULC ¹² Tenent tympanum et citharam,
et gaudent ad sonitum organi.

VULC ¹³ Ducunt in bonis dies suos,
et in puncto ad inferna descendunt.

VULC ¹⁴ Qui dixerunt Deo : Recede a nobis,
et scientiam viarum tuarum nolumus.

VULC ¹⁵ Quis est Omnipotens, ut serviamus ei ?
et quid nobis prodest si oraverimus illum ?

VULC ¹⁶ Verumtamen quia non sunt in manu eorum bona sua,
consilium impiorum longe sit a me.

VULC ¹⁷ Quoties lucerna impiorum extinguetur,
et superveniet eis inundatio,
et dolores dividet furoris sui ?

VULC ¹⁸ Erunt sicut paleæ ante faciem venti,
et sicut favilla quam turbo dispergit.

VULC ¹⁹ Deus servabit filiis illius dolorem patris,
et cum reddiderit, tunc sciet.

VULC ²⁰ Videbunt oculi ejus interfectionem suam,
et de furore Omnipotentis bibet.

VULC ²¹ Quid enim ad eum pertinet de domo sua post se,
et si numerus mensium ejus dimidietur ?

VULC ²² Numquid Deus docebit quispiam scientiam,
qui excelsos judicat ?

VULC ²³ Iste moritur robustus et sanus,
dives et felix :

VULC ²⁴ viscera ejus plena sunt adipe,
et medullis ossa illius irrigantur :

VULC ²⁵ alius vero moritur in amaritudine animæ
absque ullis opibus :

VULC ²⁶ et tamen simul in pulvere dormient,
et vermes operient eos.

VULC ²⁷ Certe novi cogitationes vestras,
et sententias contra me iniquas.

VULC ²⁸ Dicitis enim : Ubi est domus principis ?
et ubi tabernacula impiorum ?

VULC ²⁹ Interrogate quemlibet de viatoribus,
et hæc eadem illum intelligere cognoscetis :

VULC ³⁰ quia in diem perditionis servatur malus,
et ad diem furoris ducetur.

VULC ³¹ Quis arguet coram eo viam ejus ?
et quæ fecit, quis reddet illi ?

VULC ³² Ipse ad sepulchra ducetur,
et in congerie mortuorum vigilabit.

VULC ³³ Dulcis fuit glareis Cocyti,
et post se omnem hominem trahet,
et ante se innumerabiles.

VULC ³⁴ Quomodo igitur consolamini me frustra,
cum responsio vestra repugnare ostensa sit veritati ?]