VULC ¹ Addidit quoque Job, assumens parabolam suam, et dixit :

VULC ² [Quis mihi tribuat ut sim juxta menses pristinos,
secundum dies quibus Deus custodiebat me ?

VULC ³ Quando splendebat lucerna ejus super caput meum,
et ad lumen ejus ambulabam in tenebris :

VULC ⁴ sicut fui in diebus adolescentiæ meæ,
quando secreto Deus erat in tabernaculo meo :

VULC ⁵ quando erat Omnipotens mecum,
et in circuitu meo pueri mei :

VULC ⁶ quando lavabam pedes meos butyro,
et petra fundebat mihi rivos olei :

VULC ⁷ quando procedebam ad portam civitatis,
et in platea parabant cathedram mihi.

VULC ⁸ Videbant me juvenes, et abscondebantur :
et senes assurgentes stabant.

VULC ⁹ Principes cessabant loqui,
et digitum superponebant ori suo.

VULC ¹⁰ Vocem suam cohibebant duces,
et lingua eorum gutturi suo adhærebat.

VULC ¹¹ Auris audiens beatificabat me,
et oculus videns testimonium reddebat mihi :

VULC ¹² eo quod liberassem pauperem vociferantem,
et pupillum cui non esset adjutor.

VULC ¹³ Benedictio perituri super me veniebat,
et cor viduæ consolatus sum.

VULC ¹⁴ Justitia indutus sum,
et vestivi me, sicut vestimento et diademate, judicio meo.

VULC ¹⁵ Oculus fui cæco, et pes claudo.

VULC ¹⁶ Pater eram pauperum,
et causam quam nesciebam diligentissime investigabam.

VULC ¹⁷ Conterebam molas iniqui,
et de dentibus illius auferebam prædam.

VULC ¹⁸ Dicebamque : In nidulo meo moriar,
et sicut palma multiplicabo dies.

VULC ¹⁹ Radix mea aperta est secus aquas,
et ros morabitur in messione mea.

VULC ²⁰ Gloria mea semper innovabitur,
et arcus meus in manu mea instaurabitur.

VULC ²¹ Qui me audiebant, expectabant sententiam,
et intenti tacebant ad consilium meum.

VULC ²² Verbis meis addere nihil audebant,
et super illos stillabat eloquium meum.

VULC ²³ Expectabant me sicut pluviam,
et os suum aperiebant quasi ad imbrem serotinum.

VULC ²⁴ Siquando ridebam ad eos, non credebant :
et lux vultus mei non cadebat in terram.

VULC ²⁵ Si voluissem ire ad eos, sedebam primus :
cumque sederem quasi rex, circumstante exercitu,
eram tamen mœrentium consolator.]