VULC ¹ [Pepigi fœdus cum oculis meis,
ut ne cogitarem quidem de virgine.

VULC ² Quam enim partem haberet in me Deus desuper,
et hæreditatem Omnipotens de excelsis ?

VULC ³ Numquid non perditio est iniquo,
et alienatio operantibus injustitiam ?

VULC ⁴ Nonne ipse considerat vias meas,
et cunctos gressus meos dinumerat ?

VULC ⁵ Si ambulavi in vanitate,
et festinavit in dolo pes meus,

VULC ⁶ appendat me in statera justa,
et sciat Deus simplicitatem meam.

VULC ⁷ Si declinavit gressus meus de via,
et si secutum est oculos meos cor meum,
et si manibus meis adhæsit macula,

VULC ⁸ seram, et alius comedat,
et progenies mea eradicetur.

VULC ⁹ Si deceptum est cor meum super muliere,
et si ad ostium amici mei insidiatus sum,

VULC ¹⁰ scortum alterius sit uxor mea,
et super illam incurventur alii.

VULC ¹¹ Hoc enim nefas est,
et iniquitas maxima.

VULC ¹² Ignis est usque ad perditionem devorans,
et omnia eradicans genimina.

VULC ¹³ Si contempsi subire judicium cum servo meo et ancilla mea,
cum disceptarent adversum me :

VULC ¹⁴ quid enim faciam cum surrexerit ad judicandum Deus ?
et cum quæsierit, quid respondebo illi ?

VULC ¹⁵ Numquid non in utero fecit me, qui et illum operatus est,
et formavit me in vulva unus ?

VULC ¹⁶ Si negavi quod volebant pauperibus,
et oculos viduæ expectare feci ;

VULC ¹⁷ si comedi buccellam meam solus,
et non comedit pupillus ex ea

VULC ¹⁸ (quia ab infantia mea crevit mecum miseratio,
et de utero matris meæ egressa est mecum) ;

VULC ¹⁹ si despexi pereuntem, eo quod non habuerit indumentum,
et absque operimento pauperem ;

VULC ²⁰ si non benedixerunt mihi latera ejus,
et de velleribus ovium mearum calefactus est ;

VULC ²¹ si levavi super pupillum manum meam,
etiam cum viderem me in porta superiorem :

VULC ²² humerus meus a junctura sua cadat,
et brachium meum cum suis ossibus confringatur.

VULC ²³ Semper enim quasi tumentes super me fluctus timui Deum,
et pondus ejus ferre non potui.

VULC ²⁴ Si putavi aurum robur meum,
et obrizo dixi : Fiducia mea ;

VULC ²⁵ si lætatus sum super multis divitiis meis,
et quia plurima reperit manus mea ;

VULC ²⁶ si vidi solem cum fulgeret,
et lunam incedentem clare,

VULC ²⁷ et lætatum est in abscondito cor meum,
et osculatus sum manum meam ore meo :

VULC ²⁸ quæ est iniquitas maxima,
et negatio contra Deum altissimum.

VULC ²⁹ Si gavisus sum ad ruinam ejus qui me oderat,
et exsultavi quod invenisset eum malum :

VULC ³⁰ non enim dedi ad peccandum guttur meum,
ut expeterem maledicens animam ejus.

VULC ³¹ Si non dixerunt viri tabernaculi mei :
Quis det de carnibus ejus, ut saturemur ?

VULC ³² foris non mansit peregrinus :
ostium meum viatori patuit.

VULC ³³ Si abscondi quasi homo peccatum meum,
et celavi in sinu meo iniquitatem meam ;

VULC ³⁴ si expavi ad multitudinem nimiam,
et despectio propinquorum terruit me :
et non magis tacui, nec egressus sum ostium.

VULC ³⁵ Quis mihi tribuat auditorem,
ut desiderium meum audiat Omnipotens,
et librum scribat ipse qui judicat,

VULC ³⁶ ut in humero meo portem illum,
et circumdem illum quasi coronam mihi ?

VULC ³⁷ Per singulos gradus meos pronuntiabo illum,
et quasi principi offeram eum.

VULC ³⁸ Si adversum me terra mea clamat,
et cum ipsa sulci ejus deflent :

VULC ³⁹ si fructus ejus comedi absque pecunia,
et animam agricolarum ejus afflixi :

VULC ⁴⁰ pro frumento oriatur mihi tribulus,
et pro hordeo spina.] Finita sunt verba Job.