VULC ¹ Addens quoque Eliu, hæc locutus est :

VULC ² [Sustine me paululum, et indicabo tibi :
adhuc enim habeo quod pro Deo loquar.

VULC ³ Repetam scientiam meam a principio,
et operatorem meum probabo justum.

VULC ⁴ Vere enim absque mendacio sermones mei,
et perfecta scientia probabitur tibi.

VULC ⁵ Deus potentes non abjicit,
cum et ipse sit potens :

VULC ⁶ sed non salvat impios,
et judicium pauperibus tribuit.

VULC ⁷ Non auferet a justo oculos suos :
et reges in solio collocat in perpetuum,
et illi eriguntur.

VULC ⁸ Et si fuerint in catenis,
et vinciantur funibus paupertatis,

VULC ⁹ indicabit eis opera eorum,
et scelera eorum, quia violenti fuerunt.

VULC ¹⁰ Revelabit quoque aurem eorum, ut corripiat :
et loquetur, ut revertantur ab iniquitate.

VULC ¹¹ Si audierint et observaverint, complebunt dies suos in bono,
et annos suos in gloria :

VULC ¹² si autem non audierint,
transibunt per gladium,
et consumentur in stultitia.

VULC ¹³ Simulatores et callidi provocant iram Dei,
neque clamabunt cum vincti fuerint.

VULC ¹⁴ Morietur in tempestate anima eorum,
et vita eorum inter effeminatos.

VULC ¹⁵ Eripiet de angustia sua pauperem,
et revelabit in tribulatione aurem ejus.

VULC ¹⁶ Igitur salvabit te de ore angusto latissime,
et non habente fundamentum subter se :
requies autem mensæ tuæ erit plena pinguedine.

VULC ¹⁷ Causa tua quasi impii judicata est :
causam judiciumque recipies.

VULC ¹⁸ Non te ergo superet ira ut aliquem opprimas :
nec multitudo donorum inclinet te.

VULC ¹⁹ Depone magnitudinem tuam absque tribulatione,
et omnes robustos fortitudine.

VULC ²⁰ Ne protrahas noctem,
ut ascendant populi pro eis.

VULC ²¹ Cave ne declines ad iniquitatem :
hanc enim cœpisti sequi post miseriam.

VULC ²² Ecce Deus excelsus in fortitudine sua,
et nullus ei similis in legislatoribus.

VULC ²³ Quis poterit scrutari vias ejus ?
aut quis potest ei dicere : Operatus es iniquitatem ?

VULC ²⁴ Memento quod ignores opus ejus,
de quo cecinerunt viri.

VULC ²⁵ Omnes homines vident eum :
unusquisque intuetur procul.

VULC ²⁶ Ecce Deus magnus vincens scientiam nostram :
numerus annorum ejus inæstimabilis.

VULC ²⁷ Qui aufert stillas pluviæ,
et effundit imbres ad instar gurgitum,

VULC ²⁸ qui de nubibus fluunt
quæ prætexunt cuncta desuper.

VULC ²⁹ Si voluerit extendere nubes quasi tentorium suum,

VULC ³⁰ et fulgurare lumine suo desuper,
cardines quoque maris operiet.

VULC ³¹ Per hæc enim judicat populos,
et dat escas multis mortalibus.

VULC ³² In manibus abscondit lucem,
et præcepit ei ut rursus adveniat.

VULC ³³ Annuntiat de ea amico suo, quod possessio ejus sit,
et ad eam possit ascendere.]