VULC ¹ [Numquid nosti tempus partus ibicum in petris,
vel parturientes cervas observasti ?

VULC ² Dinumerasti menses conceptus earum,
et scisti tempus partus earum ?

VULC ³ Incurvantur ad fœtum, et pariunt,
et rugitus emittunt.

VULC ⁴ Separantur filii earum, et pergunt ad pastum :
egrediuntur, et non revertuntur ad eas.

VULC ⁵ Quis dimisit onagrum liberum,
et vincula ejus quis solvit ?

VULC ⁶ cui dedi in solitudine domum,
et tabernacula ejus in terra salsuginis.

VULC ⁷ Contemnit multitudinem civitatis :
clamorem exactoris non audit.

VULC ⁸ Circumspicit montes pascuæ suæ,
et virentia quæque perquirit.

VULC ⁹ Numquid volet rhinoceros servire tibi,
aut morabitur ad præsepe tuum ?

VULC ¹⁰ Numquid alligabis rhinocerota ad arandum loro tuo,
aut confringet glebas vallium post te ?

VULC ¹¹ Numquid fiduciam habebis in magna fortitudine ejus,
et derelinques ei labores tuos ?

VULC ¹² Numquid credes illi quod sementem reddat tibi,
et aream tuam congreget ?

VULC ¹³ Penna struthionis similis est
pennis herodii et accipitris.

VULC ¹⁴ Quando derelinquit ova sua in terra,
tu forsitan in pulvere calefacies ea ?

VULC ¹⁵ Obliviscitur quod pes conculcet ea,
aut bestia agri conterat.

VULC ¹⁶ Duratur ad filios suos, quasi non sint sui :
frustra laboravit, nullo timore cogente.

VULC ¹⁷ Privavit enim eam Deus sapientia,
nec dedit illi intelligentiam.

VULC ¹⁸ Cum tempus fuerit, in altum alas erigit :
deridet equum et ascensorem ejus.

VULC ¹⁹ Numquid præbebis equo fortitudinem,
aut circumdabis collo ejus hinnitum ?

VULC ²⁰ Numquid suscitabis eum quasi locustas ?
gloria narium ejus terror.

VULC ²¹ Terram ungula fodit ; exsultat audacter :
in occursum pergit armatis.

VULC ²² Contemnit pavorem,
nec cedit gladio.

VULC ²³ Super ipsum sonabit pharetra ;
vibrabit hasta et clypeus :

VULC ²⁴ fervens et fremens sorbet terram,
nec reputat tubæ sonare clangorem.

VULC ²⁵ Ubi audierit buccinam, dicit : Vah !
procul odoratur bellum :
exhortationem ducum, et ululatum exercitus.

VULC ²⁶ Numquid per sapientiam tuam plumescit accipiter,
expandens alas suas ad austrum ?

VULC ²⁷ Numquid ad præceptum tuum elevabitur aquila,
et in arduis ponet nidum suum ?

VULC ²⁸ In petris manet,
et in præruptis silicibus commoratur,
atque inaccessis rupibus.

VULC ²⁹ Inde contemplatur escam,
et de longe oculi ejus prospiciunt.

VULC ³⁰ Pulli ejus lambent sanguinem :
et ubicumque cadaver fuerit, statim adest.]

VULC ³¹ Et adjecit Dominus, et locutus est ad Job :

VULC ³² [Numquid qui contendit cum Deo, tam facile conquiescit ?
utique qui arguit Deum, debet respondere ei.]

VULC ³³ Respondens autem Job Domino, dixit :

VULC ³⁴ [Qui leviter locutus sum, respondere quid possum ?
manum meam ponam super os meum.

VULC ³⁵ Unum locutus sum, quod utinam non dixissem :
et alterum, quibus ultra non addam.]