VULC ¹ [Voca ergo, si est qui tibi respondeat,
et ad aliquem sanctorum convertere.

VULC ² Vere stultum interficit iracundia,
et parvulum occidit invidia.

VULC ³ Ego vidi stultum firma radice,
et maledixi pulchritudini ejus statim.

VULC ⁴ Longe fient filii ejus a salute,
et conterentur in porta,
et non erit qui eruat.

VULC ⁵ Cujus messem famelicus comedet,
et ipsum rapiet armatus,
et bibent sitientes divitias ejus.

VULC ⁶ Nihil in terra sine causa fit,
et de humo non oritur dolor.

VULC ⁷ Homo nascitur ad laborem,
et avis ad volatum.

VULC ⁸ Quam ob rem ego deprecabor Dominum,
et ad Deum ponam eloquium meum :

VULC ⁹ qui facit magna et inscrutabilia,
et mirabilia absque numero ;

VULC ¹⁰ qui dat pluviam super faciem terræ,
et irrigat aquis universa ;

VULC ¹¹ qui ponit humiles in sublime,
et mœrentes erigit sospitate ;

VULC ¹² qui dissipat cogitationes malignorum,
ne possint implere manus eorum quod cœperant ;

VULC ¹³ qui apprehendit sapientes in astutia eorum,
et consilium pravorum dissipat.

VULC ¹⁴ Per diem incurrent tenebras,
et quasi in nocte, sic palpabunt in meridie.

VULC ¹⁵ Porro salvum faciet egenum a gladio oris eorum,
et de manu violenti pauperem.

VULC ¹⁶ Et erit egeno spes ;
iniquitas autem contrahet os suum.

VULC ¹⁷ Beatus homo qui corripitur a Deo :
increpationem ergo Domini ne reprobes :

VULC ¹⁸ quia ipse vulnerat, et medetur ;
percutit, et manus ejus sanabunt.

VULC ¹⁹ In sex tribulationibus liberabit te,
et in septima non tanget te malum.

VULC ²⁰ In fame eruet te de morte,
et in bello de manu gladii.

VULC ²¹ A flagello linguæ absconderis,
et non timebis calamitatem cum venerit.

VULC ²² In vastitate et fame ridebis,
et bestias terræ non formidabis.

VULC ²³ Sed cum lapidibus regionum pactum tuum,
et bestiæ terræ pacificæ erunt tibi.

VULC ²⁴ Et scies quod pacem habeat tabernaculum tuum ;
et visitans speciem tuam, non peccabis.

VULC ²⁵ Scies quoque quoniam multiplex erit semen tuum,
et progenies tua quasi herba terræ.

VULC ²⁶ Ingredieris in abundantia sepulchrum,
sicut infertur acervus tritici in tempore suo.

VULC ²⁷ Ecce hoc, ut investigavimus, ita est :
quod auditum, mente pertracta.]