VULC ¹ [Ego vir videns paupertatem meam
in virga indignationis ejus.

VULC ² Me minavit, et adduxit in tenebras,
et non in lucem.

VULC ³ Tantum in me vertit et convertit
manum suam tota die.

VULC ⁴ Vetustam fecit pellem meam et carnem meam ;
contrivit ossa mea.

VULC ⁵ Ædificavit in gyro meo, et circumdedit me
felle et labore.

VULC ⁶ In tenebrosis collocavit me,
quasi mortuos sempiternos.

VULC ⁷ Circumædificavit adversum me, ut non egrediar ;
aggravavit compedem meum.

VULC ⁸ Sed et cum clamavero, et rogavero,
exclusit orationem meam.

VULC ⁹ Conclusit vias meas lapidibus quadris ;
semitas meas subvertit.

VULC ¹⁰ Ursus insidians factus est mihi,
leo in absconditis.

VULC ¹¹ Semitas meas subvertit, et confregit me ;
posuit me desolatam.

VULC ¹² Tetendit arcum suum, et posuit me
quasi signum ad sagittam.

VULC ¹³ Misit in renibus meis
filias pharetræ suæ.

VULC ¹⁴ Factus sum in derisum omni populo meo,
canticum eorum tota die.

VULC ¹⁵ Replevit me amaritudinibus ;
inebriavit me absinthio.

VULC ¹⁶ Et fregit ad numerum dentes meos ;
cibavit me cinere.

VULC ¹⁷ Et repulsa est a pace anima mea ;
oblitus sum bonorum.

VULC ¹⁸ Et dixi : Periit finis meus,
et spes mea a Domino.

VULC ¹⁹ Recordare paupertatis, et transgressionis meæ,
absinthii et fellis.

VULC ²⁰ Memoria memor ero, et tabescet
in me anima mea.

VULC ²¹ Hæc recolens in corde meo,
ideo sperabo.

VULC ²² Misericordiæ Domini, quia non sumus consumpti ;
quia non defecerunt miserationes ejus.

VULC ²³ Novi diluculo,
multa est fides tua.

VULC ²⁴ Pars mea Dominus, dixit anima mea ;
propterea exspectabo eum.

VULC ²⁵ Bonus est Dominus sperantibus in eum,
animæ quærenti illum.

VULC ²⁶ Bonum est præstolari cum silentio
salutare Dei.

VULC ²⁷ Bonum est viro cum portaverit jugum
ab adolescentia sua.

VULC ²⁸ Sedebit solitarius, et tacebit,
quia levavit super se.

VULC ²⁹ Ponet in pulvere os suum,
si forte sit spes.

VULC ³⁰ Dabit percutienti se maxillam :
saturabitur opprobriis.

VULC ³¹ Quia non repellet
in sempiternum Dominus.

VULC ³² Quia si abjecit, et miserebitur,
secundum multitudinem misericordiarum suarum.

VULC ³³ Non enim humiliavit ex corde suo
et abjecit filios hominum.

VULC ³⁴ Ut conteret sub pedibus suis
omnes vinctos terræ.

VULC ³⁵ Ut declinaret judicium viri
in conspectu vultus Altissimi.

VULC ³⁶ Ut perverteret hominem in judicio suo ;
Dominus ignoravit.

VULC ³⁷ Quis est iste qui dixit ut fieret,
Domino non jubente ?

VULC ³⁸ Ex ore Altissimi non egredientur
nec mala nec bona ?

VULC ³⁹ Quid murmuravit homo vivens,
vir pro peccatis suis ?

VULC ⁴⁰ Scrutemur vias nostras, et quæramus,
et revertamur ad Dominum.

VULC ⁴¹ Levemus corda nostra cum manibus
ad Dominum in cælos.

VULC ⁴² Nos inique egimus, et ad iracundiam provocavimus ;
idcirco tu inexorabilis es.

VULC ⁴³ Operuisti in furore, et percussisti nos ;
occidisti, nec pepercisti.

VULC ⁴⁴ Opposuisti nubem tibi,
ne transeat oratio.

VULC ⁴⁵ Eradicationem et abjectionem posuisti me
in medio populorum.

VULC ⁴⁶ Aperuerunt super nos os suum
omnes inimici.

VULC ⁴⁷ Formido et laqueus facta est nobis
vaticinatio, et contritio.

VULC ⁴⁸ Divisiones aquarum deduxit oculus meus,
in contritione filiæ populi mei.

VULC ⁴⁹ Oculus meus afflictus est, nec tacuit,
eo quod non esset requies.

VULC ⁵⁰ Donec respiceret et videret
Dominus de cælis.

VULC ⁵¹ Oculus meus deprædatus est animam meam
in cunctis filiabus urbis meæ.

VULC ⁵² Venatione ceperunt me quasi avem
inimici mei gratis.

VULC ⁵³ Lapsa est in lacum vita mea,
et posuerunt lapidem super me.

VULC ⁵⁴ Inundaverunt aquæ super caput meum ;
dixi : Perii.

VULC ⁵⁵ Invocavi nomen tuum, Domine,
de lacu novissimo.

VULC ⁵⁶ Vocem meam audisti ; ne avertas aurem tuam
a singultu meo et clamoribus.

VULC ⁵⁷ Appropinquasti in die quando invocavi te ;
dixisti : Ne timeas.

VULC ⁵⁸ Judicasti, Domine, causam animæ meæ,
redemptor vitæ meæ.

VULC ⁵⁹ Vidisti, Domine, iniquitatem illorum adversum me :
judica judicium meum.

VULC ⁶⁰ Vidisti omnem furorem,
universas cogitationes eorum adversum me.

VULC ⁶¹ Audisti opprobrium eorum, Domine,
omnes cogitationes eorum adversum me.

VULC ⁶² Labia insurgentium mihi, et meditationes eorum
adversum me tota die.

VULC ⁶³ Sessionem eorum et resurrectionem eorum vide ;
ego sum psalmus eorum.

VULC ⁶⁴ Reddes eis vicem, Domine,
juxta opera manuum suarum.

VULC ⁶⁵ Dabis eis scutum cordis,
laborem tuum.

VULC ⁶⁶ Persequeris in furore, et conteres eos
sub cælis, Domine.]