VULC ¹ [In tribulatione sua mane consurgent ad me :
Venite, et revertamur ad Dominum,

VULC ² quia ipse cepit, et sanabit nos ;
percutiet, et curabit nos.

VULC ³ Vivificabit nos post duos dies ;
in die tertia suscitabit nos,
et vivemus in conspectu ejus.
Sciemus, sequemurque ut cognoscamus Dominum :
quasi diluculum præparatus est egressus ejus,
et veniet quasi imber nobis temporaneus et serotinus terræ.

VULC ⁴ Quid faciam tibi, Ephraim ?
quid faciam tibi, Juda ?
misericordia vestra quasi nubes matutina,
et quasi ros mane pertransiens.

VULC ⁵ Propter hoc dolavi in prophetis ;
occidi eos in verbis oris mei :
et judicia tua quasi lux egredientur.

VULC ⁶ Quia misericordiam volui, et non sacrificium ;
et scientiam Dei plus quam holocausta.

VULC ⁷ Ipsi autem sicut Adam transgressi sunt pactum :
ibi prævaricati sunt in me.

VULC ⁸ Galaad civitas operantium idolum,
supplantata sanguine.

VULC ⁹ Et quasi fauces virorum latronum,
particeps sacerdotum, in via interficientium pergentes de Sichem :
quia scelus operati sunt.

VULC ¹⁰ In domo Israël vidi horrendum :
ibi fornicationes Ephraim,
contaminatus est Israël.

VULC ¹¹ Sed et Juda, pone messem tibi,
cum convertero captivitatem populi mei.]