VULC ¹ [Statera dolosa abominatio est apud Dominum,
et pondus æquum voluntas ejus.

VULC ² Ubi fuerit superbia, ibi erit et contumelia ;
ubi autem est humilitas, ibi et sapientia.

VULC ³ Simplicitas justorum diriget eos,
et supplantatio perversorum vastabit illos.

VULC ⁴ Non proderunt divitiæ in die ultionis ;
justitia autem liberabit a morte.

VULC ⁵ Justitia simplicis diriget viam ejus,
et in impietate sua corruet impius.

VULC ⁶ Justitia rectorum liberabit eos,
et in insidiis suis capientur iniqui.

VULC ⁷ Mortuo homine impio, nulla erit ultra spes,
et exspectatio sollicitorum peribit.

VULC ⁸ Justus de angustia liberatus est,
et tradetur impius pro eo.]

VULC ⁹ [Simulator ore decipit amicum suum ;
justi autem liberabuntur scientia.

VULC ¹⁰ In bonis justorum exsultabit civitas,
et in perditione impiorum erit laudatio.

VULC ¹¹ Benedictione justorum exaltabitur civitas,
et ore impiorum subvertetur.

VULC ¹² Qui despicit amicum suum indigens corde est ;
vir autem prudens tacebit.

VULC ¹³ Qui ambulat fraudulenter, revelat arcana ;
qui autem fidelis est animi, celat amici commissum.

VULC ¹⁴ Ubi non est gubernator, populus corruet ;
salus autem, ubi multa consilia.

VULC ¹⁵ Affligetur malo qui fidem facit pro extraneo ;
qui autem cavet laqueos securus erit.

VULC ¹⁶ Mulier gratiosa inveniet gloriam,
et robusti habebunt divitias.]

VULC ¹⁷ [Benefacit animæ suæ vir misericors ;
qui autem crudelis est, etiam propinquos abjicit.

VULC ¹⁸ Impius facit opus instabile,
seminanti autem justitiam merces fidelis.

VULC ¹⁹ Clementia præparat vitam,
et sectatio malorum mortem.

VULC ²⁰ Abominabile Domino cor pravum,
et voluntas ejus in iis qui simpliciter ambulant.

VULC ²¹ Manus in manu non erit innocens malus ;
semen autem justorum salvabitur.

VULC ²² Circulus aureus in naribus suis,
mulier pulchra et fatua.

VULC ²³ Desiderium justorum omne bonum est ;
præstolatio impiorum furor.

VULC ²⁴ Alii dividunt propria, et ditiores fiunt ;
alii rapiunt non sua, et semper in egestate sunt.

VULC ²⁵ Anima quæ benedicit impinguabitur,
et qui inebriat, ipse quoque inebriabitur.

VULC ²⁶ Qui abscondit frumenta maledicetur in populis ;
benedictio autem super caput vendentium.

VULC ²⁷ Bene consurgit diluculo qui quærit bona ;
qui autem investigator malorum est, opprimetur ab eis.

VULC ²⁸ Qui confidit in divitiis suis corruet :
justi autem quasi virens folium germinabunt.

VULC ²⁹ Qui conturbat domum suam possidebit ventos,
et qui stultus est serviet sapienti.

VULC ³⁰ Fructus justi lignum vitæ,
et qui suscipit animas sapiens est.

VULC ³¹ Si justus in terra recipit,
quanto magis impius et peccator !]