VULC ¹ [Filius sapiens doctrina patris ;
qui autem illusor est non audit cum arguitur.

VULC ² De fructu oris sui homo satiabitur bonis :
anima autem prævaricatorum iniqua.

VULC ³ Qui custodit os suum custodit animam suam ;
qui autem inconsideratus est ad loquendum, sentiet mala.

VULC ⁴ Vult et non vult piger ;
anima autem operantium impinguabitur.

VULC ⁵ Verbum mendax justus detestabitur ;
impius autem confundit, et confundetur.

VULC ⁶ Justitia custodit innocentis viam,
impietas autem peccatorem supplantat.]

VULC ⁷ [Est quasi dives, cum nihil habeat,
et est quasi pauper, cum in multis divitiis sit.

VULC ⁸ Redemptio animæ viri divitiæ suæ ;
qui autem pauper est, increpationem non sustinet.

VULC ⁹ Lux justorum lætificat :
lucerna autem impiorum extinguetur.

VULC ¹⁰ Inter superbos semper jurgia sunt ;
qui autem agunt omnia cum consilio, reguntur sapientia.

VULC ¹¹ Substantia festinata minuetur ;
quæ autem paulatim colligitur manu, multiplicabitur.

VULC ¹² Spes quæ differtur affligit animam ;
lignum vitæ desiderium veniens.]

VULC ¹³ [Qui detrahit alicui rei, ipse se in futurum obligat ;
qui autem timet præceptum, in pace versabitur.
Animæ dolosæ errant in peccatis :
justi autem misericordes sunt, et miserantur.

VULC ¹⁴ Lex sapientis fons vitæ,
ut declinet a ruina mortis.

VULC ¹⁵ Doctrina bona dabit gratiam ;
in itinere contemptorum vorago.

VULC ¹⁶ Astutus omnia agit cum consilio ;
qui autem fatuus est aperit stultitiam.

VULC ¹⁷ Nuntius impii cadet in malum ;
legatus autem fidelis, sanitas.

VULC ¹⁸ Egestas et ignominia ei qui deserit disciplinam ;
qui autem acquiescit arguenti glorificabitur.

VULC ¹⁹ Desiderium si compleatur delectat animam ;
detestantur stulti eos qui fugiunt mala.

VULC ²⁰ Qui cum sapientibus graditur sapiens erit ;
amicus stultorum similis efficietur.]

VULC ²¹ [Peccatores persequitur malum,
et justis retribuentur bona.

VULC ²² Bonus reliquit hæredes filios et nepotes,
et custoditur justo substantia peccatoris.

VULC ²³ Multi cibi in novalibus patrum,
et aliis congregantur absque judicio.

VULC ²⁴ Qui parcit virgæ odit filium suum ;
qui autem diligit illum instanter erudit.

VULC ²⁵ Justus comedit et replet animam suam ;
venter autem impiorum insaturabilis.]