VULC ¹ [Responsio mollis frangit iram ;
sermo durus suscitat furorem.

VULC ² Lingua sapientium ornat scientiam ;
os fatuorum ebullit stultitiam.

VULC ³ In omni loco, oculi Domini
contemplantur bonos et malos.

VULC ⁴ Lingua placabilis lignum vitæ ;
quæ autem immoderata est conteret spiritum.

VULC ⁵ Stultus irridet disciplinam patris sui ;
qui autem custodit increpationes astutior fiet.
In abundanti justitia virtus maxima est :
cogitationes autem impiorum eradicabuntur.

VULC ⁶ Domus justi plurima fortitudo,
et in fructibus impii conturbatio.

VULC ⁷ Labia sapientium disseminabunt scientiam ;
cor stultorum dissimile erit.

VULC ⁸ Victimæ impiorum abominabiles Domino ;
vota justorum placabilia.

VULC ⁹ Abominatio est Domino via impii ;
qui sequitur justitiam diligitur ab eo.

VULC ¹⁰ Doctrina mala deserenti viam vitæ ;
qui increpationes odit, morietur.

VULC ¹¹ Infernus et perditio coram Domino ;
quanto magis corda filiorum hominum !

VULC ¹² Non amat pestilens eum qui se corripit,
nec ad sapientes graditur.]

VULC ¹³ [Cor gaudens exhilarat faciem ;
in mœrore animi dejicitur spiritus.

VULC ¹⁴ Cor sapientis quærit doctrinam,
et os stultorum pascitur imperitia.

VULC ¹⁵ Omnes dies pauperis, mali ;
secura mens quasi juge convivium.

VULC ¹⁶ Melius est parum cum timore Domini,
quam thesauri magni et insatiabiles.

VULC ¹⁷ Melius est vocari ad olera cum caritate,
quam ad vitulum saginatum cum odio.

VULC ¹⁸ Vir iracundus provocat rixas ;
qui patiens est mitigat suscitatas.

VULC ¹⁹ Iter pigrorum quasi sepes spinarum ;
via justorum absque offendiculo.

VULC ²⁰ Filius sapiens lætificat patrem,
et stultus homo despicit matrem suam.

VULC ²¹ Stultitia gaudium stulto,
et vir prudens dirigit gressus suos.

VULC ²² Dissipantur cogitationes ubi non est consilium ;
ubi vero sunt plures consiliarii, confirmantur.

VULC ²³ Lætatur homo in sententia oris sui,
et sermo opportunus est optimus.

VULC ²⁴ Semita vitæ super eruditum,
ut declinet de inferno novissimo.]

VULC ²⁵ [Domum superborum demolietur Dominus,
et firmos faciet terminos viduæ.

VULC ²⁶ Abominatio Domini cogitationes malæ,
et purus sermo pulcherrimus firmabitur ab eo.

VULC ²⁷ Conturbat domum suam qui sectatur avaritiam ;
qui autem odit munera, vivet.
Per misericordiam et fidem purgantur peccata :
per timorem autem Domini declinat omnis a malo.

VULC ²⁸ Mens justi meditatur obedientiam ;
os impiorum redundat malis.

VULC ²⁹ Longe est Dominus ab impiis,
et orationes justorum exaudiet.

VULC ³⁰ Lux oculorum lætificat animam ;
fama bona impinguat ossa.

VULC ³¹ Auris quæ audit increpationes vitæ
in medio sapientium commorabitur.

VULC ³² Qui abjicit disciplinam despicit animam suam ;
qui autem acquiescit increpationibus possessor est cordis.

VULC ³³ Timor Domini disciplina sapientiæ,
et gloriam præcedit humilitas.]