VULC ¹ [Hominis est animam præparare,
et Domini gubernare linguam.

VULC ² Omnes viæ hominis patent oculis ejus ;
spirituum ponderator est Dominus.

VULC ³ Revela Domino opera tua,
et dirigentur cogitationes tuæ.

VULC ⁴ Universa propter semetipsum operatus est Dominus ;
impium quoque ad diem malum.

VULC ⁵ Abominatio Domini est omnis arrogans ;
etiamsi manus ad manum fuerit, non est innocens.
Initium viæ bonæ facere justitiam ;
accepta est autem apud Deum magis quam immolare hostias.

VULC ⁶ Misericordia et veritate redimitur iniquitas,
et in timore Domini declinatur a malo.

VULC ⁷ Cum placuerint Domino viæ hominis,
inimicos quoque ejus convertet ad pacem.

VULC ⁸ Melius est parum cum justitia
quam multi fructus cum iniquitate.

VULC ⁹ Cor hominis disponit viam suam,
sed Domini est dirigere gressus ejus.]

VULC ¹⁰ [Divinatio in labiis regis ;
in judicio non errabit os ejus.

VULC ¹¹ Pondus et statera judicia Domini sunt,
et opera ejus omnes lapides sacculi.

VULC ¹² Abominabiles regi qui agunt impie,
quoniam justitia firmatur solium.

VULC ¹³ Voluntas regum labia justa ;
qui recta loquitur diligetur.

VULC ¹⁴ Indignatio regis nuntii mortis,
et vir sapiens placabit eam.

VULC ¹⁵ In hilaritate vultus regis vita,
et clementia ejus quasi imber serotinus.]

VULC ¹⁶ [Posside sapientiam, quia auro melior est,
et acquire prudentiam, quia pretiosior est argento.

VULC ¹⁷ Semita justorum declinat mala ;
custos animæ suæ servat viam suam.

VULC ¹⁸ Contritionem præcedit superbia,
et ante ruinam exaltatur spiritus.

VULC ¹⁹ Melius est humiliari cum mitibus
quam dividere spolia cum superbis.

VULC ²⁰ Eruditus in verbo reperiet bona,
et qui sperat in Domino beatus est.

VULC ²¹ Qui sapiens est corde appellabitur prudens,
et qui dulcis eloquio majora percipiet.

VULC ²² Fons vitæ eruditio possidentis ;
doctrina stultorum fatuitas.]

VULC ²³ [Cor sapientis erudiet os ejus,
et labiis ejus addet gratiam.

VULC ²⁴ Favus mellis composita verba ;
dulcedo animæ sanitas ossium.

VULC ²⁵ Est via quæ videtur homini recta,
et novissima ejus ducunt ad mortem.

VULC ²⁶ Anima laborantis laborat sibi,
quia compulit eum os suum.

VULC ²⁷ Vir impius fodit malum,
et in labiis ejus ignis ardescit.

VULC ²⁸ Homo perversus suscitat lites,
et verbosus separat principes.

VULC ²⁹ Vir iniquus lactat amicum suum,
et ducit eum per viam non bonam.

VULC ³⁰ Qui attonitis oculis cogitat prava,
mordens labia sua perficit malum.

VULC ³¹ Corona dignitatis senectus,
quæ in viis justitiæ reperietur.

VULC ³² Melior est patiens viro forti,
et qui dominatur animo suo expugnatore urbium.

VULC ³³ Sortes mittuntur in sinum,
sed a Domino temperantur.]