VULC ¹ [Melior est pauper qui ambulat in simplicitate sua
quam dives torquens labia sua, et insipiens.

VULC ² Ubi non est scientia animæ, non est bonum,
et qui festinus est pedibus offendet.

VULC ³ Stultitia hominis supplantat gressus ejus,
et contra Deum fervet animo suo.

VULC ⁴ Divitiæ addunt amicos plurimos ;
a paupere autem et hi quos habuit separantur.

VULC ⁵ Testis falsus non erit impunitus,
et qui mendacia loquitur non effugiet.

VULC ⁶ Multi colunt personam potentis,
et amici sunt dona tribuentis.

VULC ⁷ Fratres hominis pauperis oderunt eum ;
insuper et amici procul recesserunt ab eo.]
[Qui tantum verba sectatur nihil habebit ;

VULC ⁸ qui autem possessor est mentis diligit animam suam,
et custos prudentiæ inveniet bona.

VULC ⁹ Falsus testis non erit impunitus,
et qui loquitur mendacia peribit.

VULC ¹⁰ Non decent stultum deliciæ,
nec servum dominari principibus.

VULC ¹¹ Doctrina viri per patientiam noscitur,
et gloria ejus est iniqua prætergredi.

VULC ¹² Sicut fremitus leonis, ita et regis ira,
et sicut ros super herbam, ita et hilaritas ejus.

VULC ¹³ Dolor patris filius stultus,
et tecta jugiter perstillantia litigiosa mulier.

VULC ¹⁴ Domus et divitiæ dantur a parentibus ;
a Domino autem proprie uxor prudens.

VULC ¹⁵ Pigredo immittit soporem,
et anima dissoluta esuriet.

VULC ¹⁶ Qui custodit mandatum custodit animam suam ;
qui autem negligit viam suam mortificabitur.

VULC ¹⁷ Fœneratur Domino qui miseretur pauperis,
et vicissitudinem suam reddet ei.

VULC ¹⁸ Erudi filium tuum ; ne desperes :
ad interfectionem autem ejus ne ponas animam tuam.

VULC ¹⁹ Qui impatiens est sustinebit damnum,
et cum rapuerit, aliud apponet.

VULC ²⁰ Audi consilium, et suscipe disciplinam,
ut sis sapiens in novissimis tuis.

VULC ²¹ Multæ cogitationes in corde viri ;
voluntas autem Domini permanebit.

VULC ²² Homo indigens misericors est,
et melior est pauper quam vir mendax.

VULC ²³ Timor Domini ad vitam,
et in plenitudine commorabitur absque visitatione pessima.]

VULC ²⁴ [Abscondit piger manum suam sub ascella,
nec ad os suum applicat eam.

VULC ²⁵ Pestilente flagellato stultus sapientior erit ;
si autem corripueris sapientem, intelliget disciplinam.

VULC ²⁶ Qui affligit patrem, et fugat matrem,
ignominiosus est et infelix.

VULC ²⁷ Non cesses, fili, audire doctrinam,
nec ignores sermones scientiæ.

VULC ²⁸ Testis iniquus deridet judicium,
et os impiorum devorat iniquitatem.

VULC ²⁹ Parata sunt derisoribus judicia,
et mallei percutientes stultorum corporibus.]