VULC ¹ [Quando sederis ut comedas cum principe,
diligenter attende quæ apposita sunt ante faciem tuam.

VULC ² Et statue cultrum in gutture tuo :
si tamen habes in potestate animam tuam.

VULC ³ Ne desideres de cibis ejus,
in quo est panis mendacii.

VULC ⁴ Noli laborare ut diteris,
sed prudentiæ tuæ pone modum.

VULC ⁵ Ne erigas oculos tuos ad opes quas non potes habere,
quia facient sibi pennas quasi aquilæ, et volabunt in cælum.

VULC ⁶ Ne comedas cum homine invido,
et ne desideres cibos ejus :

VULC ⁷ quoniam in similitudinem arioli et conjectoris
æstimat quod ignorat.
Comede et bibe, dicet tibi ;
et mens ejus non est tecum.

VULC ⁸ Cibos quos comederas evomes,
et perdes pulchros sermones tuos.

VULC ⁹ In auribus insipientium ne loquaris,
qui despicient doctrinam eloquii tui.

VULC ¹⁰ Ne attingas parvulorum terminos,
et agrum pupillorum ne introëas :

VULC ¹¹ propinquus enim illorum fortis est,
et ipse judicabit contra te causam illorum.]

VULC ¹² [Ingrediatur ad doctrinam cor tuum,
et aures tuæ ad verba scientiæ.

VULC ¹³ Noli subtrahere a puero disciplinam :
si enim percusseris eum virga, non morietur.

VULC ¹⁴ Tu virga percuties eum,
et animam ejus de inferno liberabis.

VULC ¹⁵ Fili mi, si sapiens fuerit animus tuus,
gaudebit tecum cor meum :

VULC ¹⁶ et exsultabunt renes mei,
cum locuta fuerint rectum labia tua.

VULC ¹⁷ Non æmuletur cor tuum peccatores,
sed in timore Domini esto tota die :

VULC ¹⁸ quia habebis spem in novissimo,
et præstolatio tua non auferetur.

VULC ¹⁹ Audi, fili mi, et esto sapiens,
et dirige in via animum tuum.

VULC ²⁰ Noli esse in conviviis potatorum,
nec in comessationibus eorum qui carnes ad vescendum conferunt :

VULC ²¹ quia vacantes potibus et dantes symbola consumentur,
et vestietur pannis dormitatio.

VULC ²² Audi patrem tuum, qui genuit te,
et ne contemnas cum senuerit mater tua.

VULC ²³ Veritatem eme, et noli vendere sapientiam,
et doctrinam, et intelligentiam.

VULC ²⁴ Exsultat gaudio pater justi ;
qui sapientem genuit, lætabitur in eo.

VULC ²⁵ Gaudeat pater tuus et mater tua,
et exsultet quæ genuit te.

VULC ²⁶ Præbe, fili mi, cor tuum mihi,
et oculi tui vias meas custodiant.

VULC ²⁷ Fovea enim profunda est meretrix,
et puteus angustus aliena.

VULC ²⁸ Insidiatur in via quasi latro,
et quos incautos viderit, interficiet.]

VULC ²⁹ [Cui væ ? cujus patri væ ?
cui rixæ ? cui foveæ ?
cui sine causa vulnera ? cui suffusio oculorum ?

VULC ³⁰ nonne his qui commorantur in vino,
et student calicibus epotandis ?

VULC ³¹ Ne intuearis vinum quando flavescit,
cum splenduerit in vitro color ejus :
ingreditur blande,

VULC ³² sed in novissimo mordebit ut coluber,
et sicut regulus venena diffundet.

VULC ³³ Oculi tui videbunt extraneas,
et cor tuum loquetur perversa.

VULC ³⁴ Et eris sicut dormiens in medio mari,
et quasi sopitus gubernator, amisso clavo.

VULC ³⁵ Et dices : Verberaverunt me, sed non dolui ;
traxerunt me, et ego non sensi.
Quando evigilabo, et rursus vina reperiam ?]