VULC ¹ [Quomodo nix in æstate, et pluviæ in messe,
sic indecens est stulto gloria.

VULC ² Sicut avis ad alia transvolans, et passer quolibet vadens,
sic maledictum frustra prolatum in quempiam superveniet.

VULC ³ Flagellum equo, et camus asino,
et virga in dorso imprudentium.

VULC ⁴ Ne respondeas stulto juxta stultitiam suam,
ne efficiaris ei similis.

VULC ⁵ Responde stulto juxta stultitiam suam,
ne sibi sapiens esse videatur.

VULC ⁶ Claudus pedibus, et iniquitatem bibens,
qui mittit verba per nuntium stultum.

VULC ⁷ Quomodo pulchras frustra habet claudus tibias,
sic indecens est in ore stultorum parabola.

VULC ⁸ Sicut qui mittit lapidem in acervum Mercurii,
ita qui tribuit insipienti honorem.

VULC ⁹ Quomodo si spina nascatur in manu temulenti,
sic parabola in ore stultorum.

VULC ¹⁰ Judicium determinat causas,
et qui imponit stulto silentium iras mitigat.

VULC ¹¹ Sicut canis qui revertitur ad vomitum suum,
sic imprudens qui iterat stultitiam suam.

VULC ¹² Vidisti hominem sapientem sibi videri ?
magis illo spem habebit insipiens.]

VULC ¹³ [Dicit piger : Leo est in via,
et leæna in itineribus.

VULC ¹⁴ Sicut ostium vertitur in cardine suo,
ita piger in lectulo suo.

VULC ¹⁵ Abscondit piger manum sub ascella sua,
et laborat si ad os suum eam converterit.

VULC ¹⁶ Sapientior sibi piger videtur
septem viris loquentibus sententias.]

VULC ¹⁷ [Sicut qui apprehendit auribus canem,
sic qui transit impatiens et commiscetur rixæ alterius.

VULC ¹⁸ Sicut noxius est qui mittit sagittas et lanceas in mortem,

VULC ¹⁹ ita vir fraudulenter nocet amico suo,
et cum fuerit deprehensus dicit : Ludens feci.

VULC ²⁰ Cum defecerint ligna extinguetur ignis,
et susurrone subtracto, jurgia conquiescent.

VULC ²¹ Sicut carbones ad prunas, et ligna ad ignem,
sic homo iracundus suscitat rixas.

VULC ²² Verba susurronis quasi simplicia,
et ipsa perveniunt ad intima ventris.

VULC ²³ Quomodo si argento sordido ornare velis vas fictile,
sic labia tumentia cum pessimo corde sociata.

VULC ²⁴ Labiis suis intelligitur inimicus,
cum in corde tractaverit dolos.

VULC ²⁵ Quando submiserit vocem suam, ne credideris ei,
quoniam septem nequitiæ sunt in corde illius.

VULC ²⁶ Qui operit odium fraudulenter,
revelabitur malitia ejus in consilio.

VULC ²⁷ Qui fodit foveam incidet in eam,
et qui volvit lapidem revertetur ad eum.

VULC ²⁸ Lingua fallax non amat veritatem,
et os lubricum operatur ruinas.]