VULC ¹ [Viro qui corripientem dura cervice contemnit,
repentinus ei superveniet interitus,
et eum sanitas non sequetur.

VULC ² In multiplicatione justorum lætabitur vulgus ;
cum impii sumpserint principatum, gemet populus.

VULC ³ Vir qui amat sapientiam lætificat patrem suum ;
qui autem nutrit scorta perdet substantiam.

VULC ⁴ Rex justus erigit terram ;
vir avarus destruet eam.

VULC ⁵ Homo qui blandis fictisque sermonibus loquitur amico suo
rete expandit gressibus ejus.

VULC ⁶ Peccantem virum iniquum involvet laqueus,
et justus laudabit atque gaudebit.

VULC ⁷ Novit justus causam pauperum ;
impius ignorat scientiam.

VULC ⁸ Homines pestilentes dissipant civitatem ;
sapientes vero avertunt furorem.

VULC ⁹ Vir sapiens si cum stulto contenderit,
sive irascatur, sive rideat, non inveniet requiem.

VULC ¹⁰ Viri sanguinum oderunt simplicem ;
justi autem quærunt animam ejus.

VULC ¹¹ Totum spiritum suum profert stultus ;
sapiens differt, et reservat in posterum.

VULC ¹² Princeps qui libenter audit verba mendacii,
omnes ministros habet impios.

VULC ¹³ Pauper et creditor obviaverunt sibi :
utriusque illuminator est Dominus.

VULC ¹⁴ Rex qui judicat in veritate pauperes,
thronus ejus in æternum firmabitur.]

VULC ¹⁵ [Virga atque correptio tribuit sapientiam ;
puer autem qui dimittitur voluntati suæ confundit matrem suam.

VULC ¹⁶ In multiplicatione impiorum multiplicabuntur scelera,
et justi ruinas eorum videbunt.

VULC ¹⁷ Erudi filium tuum, et refrigerabit te,
et dabit delicias animæ tuæ.

VULC ¹⁸ Cum prophetia defecerit, dissipabitur populus ;
qui vero custodit legem beatus est.

VULC ¹⁹ Servus verbis non potest erudiri,
quia quod dicis intelligit, et respondere contemnit.

VULC ²⁰ Vidisti hominem velocem ad loquendum ?
stultitia magis speranda est quam illius correptio.

VULC ²¹ Qui delicate a pueritia nutrit servum suum
postea sentiet eum contumacem.]

VULC ²² [Vir iracundus provocat rixas,
et qui ad indignandum facilis est erit ad peccandum proclivior.

VULC ²³ Superbum sequitur humilitas,
et humilem spiritu suscipiet gloria.

VULC ²⁴ Qui cum fure participat odit animam suam ;
adjurantem audit, et non indicat.

VULC ²⁵ Qui timet hominem cito corruet ;
qui sperat in Domino sublevabitur.

VULC ²⁶ Multi requirunt faciem principis,
et judicium a Domino egreditur singulorum.

VULC ²⁷ Abominantur justi virum impium,
et abominantur impii eos qui in recta sunt via.
Verbum custodiens filius
extra perditionem erit.]