VULC ¹ [Fili mi, ne obliviscaris legis meæ,
et præcepta mea cor tuum custodiat :

VULC ² longitudinem enim dierum, et annos vitæ, et pacem,
apponent tibi.

VULC ³ Misericordia et veritas te non deserant ;
circumda eas gutturi tuo,
et describe in tabulis cordis tui :

VULC ⁴ et invenies gratiam, et disciplinam bonam,
coram Deo et hominibus.

VULC ⁵ Habe fiduciam in Domino ex toto corde tuo,
et ne innitaris prudentiæ tuæ.

VULC ⁶ In omnibus viis tuis cogita illum,
et ipse diriget gressus tuos.

VULC ⁷ Ne sis sapiens apud temetipsum ;
time Deum, et recede a malo :

VULC ⁸ sanitas quippe erit umbilico tuo,
et irrigatio ossium tuorum.

VULC ⁹ Honora Dominum de tua substantia,
et de primitiis omnium frugum tuarum da ei :

VULC ¹⁰ et implebuntur horrea tua saturitate,
et vino torcularia tua redundabunt.]

VULC ¹¹ [Disciplinam Domini, fili mi, ne abjicias,
nec deficias cum ab eo corriperis :

VULC ¹² quem enim diligit Dominus, corripit,
et quasi pater in filio complacet sibi.

VULC ¹³ Beatus homo qui invenit sapientiam,
et qui affluit prudentia.

VULC ¹⁴ Melior est acquisitio ejus negotiatione argenti,
et auri primi et purissimi fructus ejus.

VULC ¹⁵ Pretiosior est cunctis opibus,
et omnia quæ desiderantur huic non valent comparari.

VULC ¹⁶ Longitudo dierum in dextera ejus,
et in sinistra illius divitiæ et gloria.

VULC ¹⁷ Viæ ejus viæ pulchræ,
et omnes semitæ illius pacificæ.

VULC ¹⁸ Lignum vitæ est his qui apprehenderint eam,
et qui tenuerit eam beatus.

VULC ¹⁹ Dominus sapientia fundavit terram ;
stabilivit cælos prudentia.

VULC ²⁰ Sapientia illius eruperunt abyssi,
et nubes rore concrescunt.]

VULC ²¹ [Fili mi, ne effluant hæc ab oculis tuis.
Custodi legem atque consilium,

VULC ²² et erit vita animæ tuæ,
et gratia faucibus tuis.

VULC ²³ Tunc ambulabis fiducialiter in via tua,
et pes tuus non impinget.

VULC ²⁴ Si dormieris, non timebis ;
quiesces, et suavis erit somnus tuus.

VULC ²⁵ Ne paveas repentino terrore,
et irruentes tibi potentias impiorum.

VULC ²⁶ Dominus enim erit in latere tuo,
et custodiet pedem tuum, ne capiaris.]

VULC ²⁷ [Noli prohibere benefacere eum qui potest :
si vales, et ipse benefac.

VULC ²⁸ Ne dicas amico tuo : Vade, et revertere : cras dabo tibi :
cum statim possis dare.

VULC ²⁹ Ne moliaris amico tuo malum,
cum ille in te habeat fiduciam.

VULC ³⁰ Ne contendas adversus hominem frustra,
cum ipse tibi nihil mali fecerit.

VULC ³¹ Ne æmuleris hominem injustum,
nec imiteris vias ejus :

VULC ³² quia abominatio Domini est omnis illusor,
et cum simplicibus sermocinatio ejus.

VULC ³³ Egestas a Domino in domo impii ;
habitacula autem justorum benedicentur.

VULC ³⁴ Ipse deludet illusores,
et mansuetis dabit gratiam.

VULC ³⁵ Gloriam sapientes possidebunt ;
stultorum exaltatio ignominia.]