VULC ¹ Verba Congregantis, filii Vomentis. Visio quam locutus est vir cum quo est Deus, et qui Deo secum morante confortatus, ait :

VULC ² [Stultissimus sum virorum,
et sapientia hominum non est mecum.

VULC ³ Non didici sapientiam,
et non novi scientiam sanctorum.

VULC ⁴ Quis ascendit in cælum, atque descendit ?
quis continuit spiritum in manibus suis ?
quis colligavit aquas quasi in vestimento ?
quis suscitavit omnes terminos terræ ?
quod nomen est ejus, et quod nomen filii ejus, si nosti ?

VULC ⁵ Omnis sermo Dei ignitus :
clypeus est sperantibus in se.

VULC ⁶ Ne addas quidquam verbis illius,
et arguaris, inveniarisque mendax.

VULC ⁷ Duo rogavi te :
ne deneges mihi antequam moriar :

VULC ⁸ vanitatem et verba mendacia longe fac a me ;
mendicitatem et divitias ne dederis mihi :
tribue tantum victui meo necessaria,

VULC ⁹ ne forte satiatus illiciar ad negandum,
et dicam : Quis est Dominus ?
aut egestate compulsus, furer,
et perjurem nomen Dei mei.

VULC ¹⁰ Ne accuses servum ad dominum suum,
ne forte maledicat tibi, et corruas.]

VULC ¹¹ [Generatio quæ patri suo maledicit,
et quæ matri suæ non benedicit ;

VULC ¹² generatio quæ sibi munda videtur,
et tamen non est lota a sordibus suis ;

VULC ¹³ generatio cujus excelsi sunt oculi,
et palpebræ ejus in alta surrectæ ;

VULC ¹⁴ generatio quæ pro dentibus gladios habet,
et commandit molaribus suis,
ut comedat inopes de terra,
et pauperes ex hominibus.

VULC ¹⁵ Sanguisugæ duæ sunt filiæ,
dicentes : Affer, affer.
Tria sunt insaturabilia,
et quartum quod numquam dicit : Sufficit.

VULC ¹⁶ Infernus, et os vulvæ,
et terra quæ non satiatur aqua :
ignis vero numquam dicit : Sufficit.

VULC ¹⁷ Oculum qui subsannat patrem,
et qui despicit partum matris suæ,
effodiant eum corvi de torrentibus,
et comedant eum filii aquilæ !]

VULC ¹⁸ [Tria sunt difficilia mihi,
et quartum penitus ignoro :

VULC ¹⁹ viam aquilæ in cælo,
viam colubri super petram,
viam navis in medio mari,
et viam viri in adolescentia.

VULC ²⁰ Talis est et via mulieris adulteræ,
quæ comedit, et tergens os suum
dicit : Non sum operata malum.

VULC ²¹ Per tria movetur terra,
et quartum non potest sustinere :

VULC ²² per servum, cum regnaverit ;
per stultum, cum saturatus fuerit cibo ;

VULC ²³ per odiosam mulierem, cum in matrimonio fuerit assumpta ;
et per ancillam, cum fuerit hæres dominæ suæ.]

VULC ²⁴ [Quatuor sunt minima terræ,
et ipsa sunt sapientiora sapientibus :

VULC ²⁵ formicæ, populus infirmus,
qui præparat in messe cibum sibi ;

VULC ²⁶ lepusculus, plebs invalida,
qui collocat in petra cubile suum ;

VULC ²⁷ regem locusta non habet,
et egreditur universa per turmas suas ;

VULC ²⁸ stellio manibus nititur,
et moratur in ædibus regis.

VULC ²⁹ Tria sunt quæ bene gradiuntur,
et quartum quod incedit feliciter :

VULC ³⁰ leo, fortissimus bestiarum,
ad nullius pavebit occursum ;

VULC ³¹ gallus succinctus lumbos ;
et aries ; nec est rex, qui resistat ei.

VULC ³² Est qui stultus apparuit postquam elevatus est in sublime ;
si enim intellexisset, ori suo imposuisset manum.

VULC ³³ Qui autem fortiter premit ubera ad eliciendum lac exprimit butyrum ;
et qui vehementer emungit elicit sanguinem ;
et qui provocat iras producit discordias.]