VULC ¹ Verba Lamuelis regis. Visio qua erudivit eum mater sua.

VULC ² [Quid, dilecte mi ? quid, dilecte uteri mei ?
quid, dilecte votorum meorum ?

VULC ³ Ne dederis mulieribus substantiam tuam,
et divitias tuas ad delendos reges.

VULC ⁴ Noli regibus, o Lamuel, noli regibus dare vinum,
quia nullum secretum est ubi regnat ebrietas ;

VULC ⁵ et ne forte bibant, et obliviscantur judiciorum,
et mutent causam filiorum pauperis.

VULC ⁶ Date siceram mœrentibus,
et vinum his qui amaro sunt animo.

VULC ⁷ Bibant, et obliviscantur egestatis suæ,
et doloris sui non recordentur amplius.

VULC ⁸ Aperi os tuum muto,
et causis omnium filiorum qui pertranseunt.

VULC ⁹ Aperi os tuum, decerne quod justum est,
et judica inopem et pauperem.]

VULC ¹⁰ [Mulierem fortem quis inveniet ?
procul et de ultimis finibus pretium ejus.

VULC ¹¹ Confidit in ea cor viri sui,
et spoliis non indigebit.

VULC ¹² Reddet ei bonum, et non malum,
omnibus diebus vitæ suæ.

VULC ¹³ Quæsivit lanam et linum,
et operata est consilio manuum suarum.

VULC ¹⁴ Facta est quasi navis institoris,
de longe portans panem suum.

VULC ¹⁵ Et de nocte surrexit,
deditque prædam domesticis suis,
et cibaria ancillis suis.

VULC ¹⁶ Consideravit agrum, et emit eum ;
de fructu manuum suarum plantavit vineam.

VULC ¹⁷ Accinxit fortitudine lumbos suos,
et roboravit brachium suum.

VULC ¹⁸ Gustavit, et vidit quia bona est negotiatio ejus ;
non extinguetur in nocte lucerna ejus.

VULC ¹⁹ Manum suam misit ad fortia,
et digiti ejus apprehenderunt fusum.

VULC ²⁰ Manum suam aperuit inopi,
et palmas suas extendit ad pauperem.

VULC ²¹ Non timebit domui suæ a frigoribus nivis ;
omnes enim domestici ejus vestiti sunt duplicibus.

VULC ²² Stragulatam vestem fecit sibi ;
byssus et purpura indumentum ejus.

VULC ²³ Nobilis in portis vir ejus,
quando sederit cum senatoribus terræ.

VULC ²⁴ Sindonem fecit, et vendidit,
et cingulum tradidit Chananæo.

VULC ²⁵ Fortitudo et decor indumentum ejus,
et ridebit in die novissimo.

VULC ²⁶ Os suum aperuit sapientiæ,
et lex clementiæ in lingua ejus.

VULC ²⁷ Consideravit semitas domus suæ,
et panem otiosa non comedit.

VULC ²⁸ Surrexerunt filii ejus, et beatissimam prædicaverunt ;
vir ejus, et laudavit eam.

VULC ²⁹ Multæ filiæ congregaverunt divitias ;
tu supergressa es universas.

VULC ³⁰ Fallax gratia, et vana est pulchritudo :
mulier timens Dominum, ipsa laudabitur.

VULC ³¹ Date ei de fructu manuum suarum,
et laudent eam in portis opera ejus.]