VULC ¹ [Audite, filii, disciplinam patris,
et attendite ut sciatis prudentiam.

VULC ² Donum bonum tribuam vobis :
legem meam ne derelinquatis.

VULC ³ Nam et ego filius fui patris mei,
tenellus et unigenitus coram matre mea.

VULC ⁴ Et docebat me, atque dicebat :
Suscipiat verba mea cor tuum ;
custodi præcepta mea, et vives.

VULC ⁵ Posside sapientiam, posside prudentiam :
ne obliviscaris, neque declines a verbis oris mei.

VULC ⁶ Ne dimittas eam, et custodiet te :
dilige eam, et conservabit te.

VULC ⁷ Principium sapientiæ : posside sapientiam,
et in omni possessione tua acquire prudentiam.

VULC ⁸ Arripe illam, et exaltabit te ;
glorificaberis ab ea cum eam fueris amplexatus.

VULC ⁹ Dabit capiti tuo augmenta gratiarum,
et corona inclyta proteget te.]

VULC ¹⁰ [Audi, fili mi, et suscipe verba mea,
ut multiplicentur tibi anni vitæ.

VULC ¹¹ Viam sapientiæ monstrabo tibi ;
ducam te per semitas æquitatis :

VULC ¹² quas cum ingressus fueris, non arctabuntur gressus tui,
et currens non habebis offendiculum.

VULC ¹³ Tene disciplinam, ne dimittas eam ;
custodi illam, quia ipsa est vita tua.

VULC ¹⁴ Ne delecteris in semitis impiorum,
nec tibi placeat malorum via.

VULC ¹⁵ Fuge ab ea, nec transeas per illam ;
declina, et desere eam.

VULC ¹⁶ Non enim dormiunt nisi malefecerint,
et rapitur somnus ab eis nisi supplantaverint.

VULC ¹⁷ Comedunt panem impietatis,
et vinum iniquitatis bibunt.

VULC ¹⁸ Justorum autem semita quasi lux splendens procedit,
et crescit usque ad perfectam diem.

VULC ¹⁹ Via impiorum tenebrosa ;
nesciunt ubi corruant.

VULC ²⁰ Fili mi, ausculta sermones meos,
et ad eloquia mea inclina aurem tuam.

VULC ²¹ Ne recedant ab oculis tuis :
custodi ea in medio cordis tui :

VULC ²² vita enim sunt invenientibus ea,
et universæ carni sanitas.

VULC ²³ Omni custodia serva cor tuum,
quia ex ipso vita procedit.

VULC ²⁴ Remove a te os pravum,
et detrahentia labia sint procul a te.

VULC ²⁵ Oculi tui recta videant,
et palpebræ tuæ præcedant gressus tuos.

VULC ²⁶ Dirige semitam pedibus tuis,
et omnes viæ tuæ stabilientur.

VULC ²⁷ Ne declines ad dexteram neque ad sinistram ;
averte pedem tuum a malo :
vias enim quæ a dextris sunt novit Dominus :
perversæ vero sunt quæ a sinistris sunt.
Ipse autem rectos faciet cursus tuos,
itinera autem tua in pace producet.]