VULC ¹ Alleluja. [Confitemini Domino, et invocate nomen ejus ;
annuntiate inter gentes opera ejus.

VULC ² Cantate ei, et psallite ei ;
narrate omnia mirabilia ejus.

VULC ³ Laudamini in nomine sancto ejus ;
lætetur cor quærentium Dominum.

VULC ⁴ Quærite Dominum, et confirmamini ;
quærite faciem ejus semper.

VULC ⁵ Mementote mirabilium ejus quæ fecit ;
prodigia ejus, et judicia oris ejus :

VULC ⁶ semen Abraham servi ejus ;
filii Jacob electi ejus.

VULC ⁷ Ipse Dominus Deus noster ;
in universa terra judicia ejus.

VULC ⁸ Memor fuit in sæculum testamenti sui ;
verbi quod mandavit in mille generationes :

VULC ⁹ quod disposuit ad Abraham,
et juramenti sui ad Isaac :

VULC ¹⁰ et statuit illud Jacob in præceptum,
et Israël in testamentum æternum,

VULC ¹¹ dicens : Tibi dabo terram Chanaan,
funiculum hæreditatis vestræ :

VULC ¹² cum essent numero brevi,
paucissimi, et incolæ ejus.

VULC ¹³ Et pertransierunt de gente in gentem,
et de regno ad populum alterum.

VULC ¹⁴ Non reliquit hominem nocere eis :
et corripuit pro eis reges.

VULC ¹⁵ Nolite tangere christos meos,
et in prophetis meis nolite malignari.

VULC ¹⁶ Et vocavit famem super terram,
et omne firmamentum panis contrivit.

VULC ¹⁷ Misit ante eos virum :
in servum venundatus est, Joseph.

VULC ¹⁸ Humiliaverunt in compedibus pedes ejus ;
ferrum pertransiit animam ejus :

VULC ¹⁹ donec veniret verbum ejus.
Eloquium Domini inflammavit eum.

VULC ²⁰ Misit rex, et solvit eum ;
princeps populorum, et dimisit eum.

VULC ²¹ Constituit eum dominum domus suæ,
et principem omnis possessionis suæ :

VULC ²² ut erudiret principes ejus sicut semetipsum,
et senes ejus prudentiam doceret.

VULC ²³ Et intravit Israël in Ægyptum,
et Jacob accola fuit in terra Cham.

VULC ²⁴ Et auxit populum suum vehementer,
et firmavit eum super inimicos ejus.

VULC ²⁵ Convertit cor eorum, ut odirent populum ejus,
et dolum facerent in servos ejus.

VULC ²⁶ Misit Moysen servum suum ;
Aaron quem elegit ipsum.

VULC ²⁷ Posuit in eis verba signorum suorum,
et prodigiorum in terra Cham.

VULC ²⁸ Misit tenebras, et obscuravit ;
et non exacerbavit sermones suos.

VULC ²⁹ Convertit aquas eorum in sanguinem,
et occidit pisces eorum.

VULC ³⁰ Edidit terra eorum ranas
in penetralibus regum ipsorum.

VULC ³¹ Dixit, et venit cœnomyia et ciniphes
in omnibus finibus eorum.

VULC ³² Posuit pluvias eorum grandinem :
ignem comburentem in terra ipsorum.

VULC ³³ Et percussit vineas eorum, et ficulneas eorum,
et contrivit lignum finium eorum.

VULC ³⁴ Dixit, et venit locusta,
et bruchus cujus non erat numerus :

VULC ³⁵ et comedit omne fœnum in terra eorum,
et comedit omnem fructum terræ eorum.

VULC ³⁶ Et percussit omne primogenitum in terra eorum,
primitias omnis laboris eorum.

VULC ³⁷ Et eduxit eos cum argento et auro,
et non erat in tribubus eorum infirmus.

VULC ³⁸ Lætata est Ægyptus in profectione eorum,
quia incubuit timor eorum super eos.

VULC ³⁹ Expandit nubem in protectionem eorum,
et ignem ut luceret eis per noctem.

VULC ⁴⁰ Petierunt, et venit coturnix,
et pane cæli saturavit eos.

VULC ⁴¹ Dirupit petram, et fluxerunt aquæ :
abierunt in sicco flumina.

VULC ⁴² Quoniam memor fuit verbi sancti sui,
quod habuit ad Abraham puerum suum.

VULC ⁴³ Et eduxit populum suum in exsultatione,
et electos suos in lætitia.

VULC ⁴⁴ Et dedit illis regiones gentium,
et labores populorum possederunt :

VULC ⁴⁵ ut custodiant justificationes ejus,
et legem ejus requirant.]