VULC ¹ In finem, pro octava. Psalmus David.

VULC ² [Salvum me fac, Domine, quoniam defecit sanctus,
quoniam diminutæ sunt veritates a filiis hominum.

VULC ³ Vana locuti sunt unusquisque ad proximum suum ;
labia dolosa, in corde et corde locuti sunt.

VULC ⁴ Disperdat Dominus universa labia dolosa,
et linguam magniloquam.

VULC ⁵ Qui dixerunt : Linguam nostram magnificabimus ;
labia nostra a nobis sunt.
Quis noster dominus est ?

VULC ⁶ Propter miseriam inopum, et gemitum pauperum,
nunc exsurgam, dicit Dominus.
Ponam in salutari ;
fiducialiter agam in eo.

VULC ⁷ Eloquia Domini, eloquia casta ; argentum igne examinatum,
probatum terræ, purgatum septuplum.

VULC ⁸ Tu, Domine, servabis nos,
et custodies nos a generatione hac in æternum.

VULC ⁹ In circuitu impii ambulant :
secundum altitudinem tuam multiplicasti filios hominum.]