VULC ¹ Psalmus David, Jeremiæ. [Super flumina Babylonis illic sedimus et flevimus,
cum recordaremur Sion.

VULC ² In salicibus in medio ejus
suspendimus organa nostra :

VULC ³ quia illic interrogaverunt nos, qui captivos duxerunt nos,
verba cantionum ;
et qui abduxerunt nos :
Hymnum cantate nobis de canticis Sion.

VULC ⁴ Quomodo cantabimus canticum Domini
in terra aliena ?

VULC ⁵ Si oblitus fuero tui, Jerusalem,
oblivioni detur dextera mea.

VULC ⁶ Adhæreat lingua mea faucibus meis,
si non meminero tui ;
si non proposuero Jerusalem
in principio lætitiæ meæ.

VULC ⁷ Memor esto, Domine, filiorum Edom,
in die Jerusalem :
qui dicunt : Exinanite, exinanite
usque ad fundamentum in ea.

VULC ⁸ Filia Babylonis misera ! beatus qui retribuet tibi
retributionem tuam quam retribuisti nobis.

VULC ⁹ Beatus qui tenebit,
et allidet parvulos tuos ad petram.]