VULC ¹ In finem. Psalmus David.

VULC ² [Eripe me, Domine, ab homine malo ;
a viro iniquo eripe me.

VULC ³ Qui cogitaverunt iniquitates in corde,
tota die constituebant prælia.

VULC ⁴ Acuerunt linguas suas sicut serpentis ;
venenum aspidum sub labiis eorum.

VULC ⁵ Custodi me, Domine, de manu peccatoris,
et ab hominibus iniquis eripe me.
Qui cogitaverunt supplantare gressus meos :

VULC ⁶ absconderunt superbi laqueum mihi.
Et funes extenderunt in laqueum ;
juxta iter, scandalum posuerunt mihi.

VULC ⁷ Dixi Domino : Deus meus es tu ;
exaudi, Domine, vocem deprecationis meæ.

VULC ⁸ Domine, Domine, virtus salutis meæ,
obumbrasti super caput meum in die belli.

VULC ⁹ Ne tradas me, Domine, a desiderio meo peccatori :
cogitaverunt contra me ;
ne derelinquas me, ne forte exaltentur.

VULC ¹⁰ Caput circuitus eorum :
labor labiorum ipsorum operiet eos.

VULC ¹¹ Cadent super eos carbones ;
in ignem dejicies eos :
in miseriis non subsistent.

VULC ¹² Vir linguosus non dirigetur in terra ;
virum injustum mala capient in interitu.

VULC ¹³ Cognovi quia faciet Dominus judicium inopis,
et vindictam pauperum.

VULC ¹⁴ Verumtamen justi confitebuntur nomini tuo,
et habitabunt recti cum vultu tuo.]