VULC ¹ Alleluja. [Cantate Domino canticum novum ;
laus ejus in ecclesia sanctorum.

VULC ² Lætetur Israël in eo qui fecit eum,
et filii Sion exsultent in rege suo.

VULC ³ Laudent nomen ejus in choro ;
in tympano et psalterio psallant ei.

VULC ⁴ Quia beneplacitum est Domino in populo suo,
et exaltabit mansuetos in salutem.

VULC ⁵ Exsultabunt sancti in gloria ;
lætabuntur in cubilibus suis.

VULC ⁶ Exaltationes Dei in gutture eorum,
et gladii ancipites in manibus eorum :

VULC ⁷ ad faciendam vindictam in nationibus,
increpationes in populis ;

VULC ⁸ ad alligandos reges eorum in compedibus,
et nobiles eorum in manicis ferreis ;

VULC ⁹ ut faciant in eis judicium conscriptum :
gloria hæc est omnibus sanctis ejus.
Alleluja.]