VULC ¹ Oratio David. [Exaudi, Domine, justitiam meam ;
intende deprecationem meam.
Auribus percipe orationem meam,
non in labiis dolosis.

VULC ² De vultu tuo judicium meum prodeat ;
oculi tui videant æquitates.

VULC ³ Probasti cor meum, et visitasti nocte ;
igne me examinasti, et non est inventa in me iniquitas.

VULC ⁴ Ut non loquatur os meum opera hominum :
propter verba labiorum tuorum, ego custodivi vias duras.

VULC ⁵ Perfice gressus meos in semitis tuis,
ut non moveantur vestigia mea.

VULC ⁶ Ego clamavi, quoniam exaudisti me, Deus ;
inclina aurem tuam mihi, et exaudi verba mea.

VULC ⁷ Mirifica misericordias tuas,
qui salvos facis sperantes in te.

VULC ⁸ A resistentibus dexteræ tuæ custodi me
ut pupillam oculi.
Sub umbra alarum tuarum protege me

VULC ⁹ a facie impiorum qui me afflixerunt.
Inimici mei animam meam circumdederunt ;

VULC ¹⁰ adipem suum concluserunt :
os eorum locutum est superbiam.

VULC ¹¹ Projicientes me nunc circumdederunt me ;
oculos suos statuerunt declinare in terram.

VULC ¹² Susceperunt me sicut leo paratus ad prædam,
et sicut catulus leonis habitans in abditis.

VULC ¹³ Exsurge, Domine : præveni eum, et supplanta eum :
eripe animam meam ab impio ;
frameam tuam

VULC ¹⁴ ab inimicis manus tuæ.
Domine, a paucis de terra divide eos in vita eorum ;
de absconditis tuis adimpletus est venter eorum.
Saturati sunt filiis,
et dimiserunt reliquias suas parvulis suis.

VULC ¹⁵ Ego autem in justitia apparebo conspectui tuo ;
satiabor cum apparuerit gloria tua.]