VULC ¹ In finem, in carminibus. Psalmus David.

VULC ² [Cum invocarem exaudivit me Deus justitiæ meæ,
in tribulatione dilatasti mihi.
Miserere mei, et exaudi orationem meam.

VULC ³ Filii hominum, usquequo gravi corde ?
ut quid diligitis vanitatem, et quæritis mendacium ?

VULC ⁴ Et scitote quoniam mirificavit Dominus sanctum suum ;
Dominus exaudiet me cum clamavero ad eum.

VULC ⁵ Irascimini, et nolite peccare ;
quæ dicitis in cordibus vestris, in cubilibus vestris compungimini.

VULC ⁶ Sacrificate sacrificium justitiæ, et sperate in Domino.
Multi dicunt : Quis ostendit nobis bona ?

VULC ⁷ Signatum est super nos lumen vultus tui, Domine :
dedisti lætitiam in corde meo.

VULC ⁸ A fructu frumenti, vini, et olei sui, multiplicati sunt.

VULC ⁹ In pace in idipsum dormiam, et requiescam ;

VULC ¹⁰ quoniam tu, Domine, singulariter in spe constituisti me.]