VULC ¹ In finem. Canticum psalmi resurrectionis. [Jubilate Deo, omnis terra ;

VULC ² psalmum dicite nomini ejus ;
date gloriam laudi ejus.

VULC ³ Dicite Deo : Quam terribilia sunt opera tua, Domine !
in multitudine virtutis tuæ mentientur tibi inimici tui.

VULC ⁴ Omnis terra adoret te, et psallat tibi ;
psalmum dicat nomini tuo.

VULC ⁵ Venite, et videte opera Dei :
terribilis in consiliis super filios hominum.

VULC ⁶ Qui convertit mare in aridam ;
in flumine pertransibunt pede :
ibi lætabimur in ipso.

VULC ⁷ Qui dominatur in virtute sua in æternum ;
oculi ejus super gentes respiciunt :
qui exasperant non exaltentur in semetipsis.

VULC ⁸ Benedicite, gentes, Deum nostrum,
et auditam facite vocem laudis ejus :

VULC ⁹ qui posuit animam meam ad vitam,
et non dedit in commotionem pedes meos.

VULC ¹⁰ Quoniam probasti nos, Deus ;
igne nos examinasti, sicut examinatur argentum.

VULC ¹¹ Induxisti nos in laqueum ;
posuisti tribulationes in dorso nostro ;

VULC ¹² imposuisti homines super capita nostra.
Transivimus per ignem et aquam,
et eduxisti nos in refrigerium.

VULC ¹³ Introibo in domum tuam in holocaustis ;
reddam tibi vota mea

VULC ¹⁴ quæ distinxerunt labia mea :
et locutum est os meum in tribulatione mea.

VULC ¹⁵ Holocausta medullata offeram tibi, cum incenso arietum ;
offeram tibi boves cum hircis.

VULC ¹⁶ Venite, audite, et narrabo, omnes qui timetis Deum,
quanta fecit animæ meæ.

VULC ¹⁷ Ad ipsum ore meo clamavi,
et exaltavi sub lingua mea.

VULC ¹⁸ Iniquitatem si aspexi in corde meo,
non exaudiet Dominus.

VULC ¹⁹ Propterea exaudivit Deus,
et attendit voci deprecationis meæ.

VULC ²⁰ Benedictus Deus, qui non amovit orationem meam,
et misericordiam suam a me.]