VULC ¹ Intellectus Asaph. [Ut quid, Deus, repulisti in finem,
iratus est furor tuus super oves pascuæ tuæ ?

VULC ² Memor esto congregationis tuæ,
quam possedisti ab initio.
Redemisti virgam hæreditatis tuæ,
mons Sion, in quo habitasti in eo.

VULC ³ Leva manus tuas in superbias eorum in finem :
quanta malignatus est inimicus in sancto !

VULC ⁴ Et gloriati sunt qui oderunt te in medio solemnitatis tuæ ;
posuerunt signa sua, signa :

VULC ⁵ et non cognoverunt sicut in exitu super summum.
Quasi in silva lignorum securibus

VULC ⁶ exciderunt januas ejus in idipsum ;
in securi et ascia dejecerunt eam.

VULC ⁷ Incenderunt igni sanctuarium tuum ;
in terra polluerunt tabernaculum nominis tui.

VULC ⁸ Dixerunt in corde suo cognatio eorum simul :
Quiescere faciamus omnes dies festos Dei a terra.

VULC ⁹ Signa nostra non vidimus ;
jam non est propheta ;
et nos non cognoscet amplius.

VULC ¹⁰ Usquequo, Deus, improperabit inimicus ?
irritat adversarius nomen tuum in finem ?

VULC ¹¹ Ut quid avertis manum tuam,
et dexteram tuam de medio sinu tuo in finem ?

VULC ¹² Deus autem rex noster ante sæcula :
operatus est salutem in medio terræ.

VULC ¹³ Tu confirmasti in virtute tua mare ;
contribulasti capita draconum in aquis.

VULC ¹⁴ Tu confregisti capita draconis ;
dedisti eum escam populis Æthiopum.

VULC ¹⁵ Tu dirupisti fontes et torrentes ;
tu siccasti fluvios Ethan.

VULC ¹⁶ Tuus est dies, et tua est nox ;
tu fabricatus es auroram et solem.

VULC ¹⁷ Tu fecisti omnes terminos terræ ;
æstatem et ver tu plasmasti ea.

VULC ¹⁸ Memor esto hujus : inimicus improperavit Domino,
et populus insipiens incitavit nomen tuum.

VULC ¹⁹ Ne tradas bestiis animas confitentes tibi,
et animas pauperum tuorum ne obliviscaris in finem.

VULC ²⁰ Respice in testamentum tuum,
quia repleti sunt qui obscurati sunt terræ domibus iniquitatum.

VULC ²¹ Ne avertatur humilis factus confusus ;
pauper et inops laudabunt nomen tuum.

VULC ²² Exsurge, Deus, judica causam tuam ;
memor esto improperiorum tuorum,
eorum quæ ab insipiente sunt tota die.

VULC ²³ Ne obliviscaris voces inimicorum tuorum :
superbia eorum qui te oderunt ascendit semper.]