VULC ¹ In finem, ne corrumpas. Psalmus cantici Asaph.

VULC ² [Confitebimur tibi, Deus, confitebimur,
et invocabimus nomen tuum ;
narrabimus mirabilia tua.

VULC ³ Cum accepero tempus,
ego justitias judicabo.

VULC ⁴ Liquefacta est terra et omnes qui habitant in ea :
ego confirmavi columnas ejus.

VULC ⁵ Dixi iniquis : Nolite inique agere :
et delinquentibus : Nolite exaltare cornu :

VULC ⁶ nolite extollere in altum cornu vestrum ;
nolite loqui adversus Deum iniquitatem.

VULC ⁷ Quia neque ab oriente, neque ab occidente,
neque a desertis montibus :

VULC ⁸ quoniam Deus judex est.
Hunc humiliat, et hunc exaltat :

VULC ⁹ quia calix in manu Domini vini meri, plenus misto.
Et inclinavit ex hoc in hoc ;
verumtamen fæx ejus non est exinanita :
bibent omnes peccatores terræ.

VULC ¹⁰ Ego autem annuntiabo in sæculum ;
cantabo Deo Jacob :

VULC ¹¹ et omnia cornua peccatorum confringam,
et exaltabuntur cornua justi.]