VULC ¹ In finem, in laudibus. Psalmus Asaph, canticum ad Assyrios.

VULC ² [Notus in Judæa Deus ;
in Israël magnum nomen ejus.

VULC ³ Et factus est in pace locus ejus,
et habitatio ejus in Sion.

VULC ⁴ Ibi confregit potentias arcuum,
scutum, gladium, et bellum.

VULC ⁵ Illuminans tu mirabiliter a montibus æternis ;

VULC ⁶ turbati sunt omnes insipientes corde.
Dormierunt somnum suum,
et nihil invenerunt omnes viri divitiarum in manibus suis.

VULC ⁷ Ab increpatione tua, Deus Jacob,
dormitaverunt qui ascenderunt equos.

VULC ⁸ Tu terribilis es ; et quis resistet tibi ?
ex tunc ira tua.

VULC ⁹ De cælo auditum fecisti judicium :
terra tremuit et quievit

VULC ¹⁰ cum exsurgeret in judicium Deus,
ut salvos faceret omnes mansuetos terræ.

VULC ¹¹ Quoniam cogitatio hominis confitebitur tibi,
et reliquiæ cogitationis diem festum agent tibi.

VULC ¹² Vovete et reddite Domino Deo vestro,
omnes qui in circuitu ejus affertis munera :
terribili,

VULC ¹³ et ei qui aufert spiritum principum :
terribili apud reges terræ.]