VULC ¹ In finem, pro iis qui commutabuntur. Testimonium Asaph, psalmus.

VULC ² [Qui regis Israël, intende ;
qui deducis velut ovem Joseph.
Qui sedes super cherubim, manifestare

VULC ³ coram Ephraim, Benjamin, et Manasse.
Excita potentiam tuam, et veni,
ut salvos facias nos.

VULC ⁴ Deus, converte nos, et ostende faciem tuam,
et salvi erimus.

VULC ⁵ Domine Deus virtutum,
quousque irasceris super orationem servi tui ?

VULC ⁶ cibabis nos pane lacrimarum,
et potum dabis nobis in lacrimis in mensura ?

VULC ⁷ Posuisti nos in contradictionem vicinis nostris,
et inimici nostri subsannaverunt nos.

VULC ⁸ Deus virtutum, converte nos, et ostende faciem tuam,
et salvi erimus.

VULC ⁹ Vineam de Ægypto transtulisti :
ejecisti gentes, et plantasti eam.

VULC ¹⁰ Dux itineris fuisti in conspectu ejus ;
plantasti radices ejus, et implevit terram.

VULC ¹¹ Operuit montes umbra ejus,
et arbusta ejus cedros Dei.

VULC ¹² Extendit palmites suos usque ad mare,
et usque ad flumen propagines ejus.

VULC ¹³ Ut quid destruxisti maceriam ejus,
et vindemiant eam omnes qui prætergrediuntur viam ?

VULC ¹⁴ Exterminavit eam aper de silva,
et singularis ferus depastus est eam.

VULC ¹⁵ Deus virtutum, convertere,
respice de cælo, et vide,
et visita vineam istam :

VULC ¹⁶ et perfice eam quam plantavit dextera tua,
et super filium hominis quem confirmasti tibi.

VULC ¹⁷ Incensa igni et suffossa,
ab increpatione vultus tui peribunt.

VULC ¹⁸ Fiat manus tua super virum dexteræ tuæ,
et super filium hominis quem confirmasti tibi.

VULC ¹⁹ Et non discedimus a te :
vivificabis nos, et nomen tuum invocabimus.

VULC ²⁰ Domine Deus virtutum, converte nos, et ostende faciem tuam,
et salvi erimus.]