VULC ¹ In finem, pro torcularibus. Psalmus David.

VULC ² [Domine, Dominus noster,
quam admirabile est nomen tuum in universa terra !
quoniam elevata est magnificentia tua super cælos.

VULC ³ Ex ore infantium et lactentium perfecisti laudem propter inimicos tuos,
ut destruas inimicum et ultorem.

VULC ⁴ Quoniam videbo cælos tuos, opera digitorum tuorum,
lunam et stellas quæ tu fundasti.

VULC ⁵ Quid est homo, quod memor es ejus ?
aut filius hominis, quoniam visitas eum ?

VULC ⁶ Minuisti eum paulominus ab angelis ;
gloria et honore coronasti eum ;

VULC ⁷ et constituisti eum super opera manuum tuarum.

VULC ⁸ Omnia subjecisti sub pedibus ejus,
oves et boves universas,
insuper et pecora campi,

VULC ⁹ volucres cæli, et pisces maris
qui perambulant semitas maris.

VULC ¹⁰ Domine, Dominus noster,
quam admirabile est nomen tuum in universa terra !]