VULC ¹ In finem, pro torcularibus. Psalmus ipsi Asaph.

VULC ² [Exsultate Deo adjutori nostro ;
jubilate Deo Jacob.

VULC ³ Sumite psalmum, et date tympanum ;
psalterium jucundum cum cithara.

VULC ⁴ Buccinate in neomenia tuba,
in insigni die solemnitatis vestræ :

VULC ⁵ quia præceptum in Israël est,
et judicium Deo Jacob.

VULC ⁶ Testimonium in Joseph posuit illud,
cum exiret de terra Ægypti ;
linguam quam non noverat, audivit.

VULC ⁷ Divertit ab oneribus dorsum ejus ;
manus ejus in cophino servierunt.

VULC ⁸ In tribulatione invocasti me, et liberavi te.
Exaudivi te in abscondito tempestatis ;
probavi te apud aquam contradictionis.

VULC ⁹ Audi, populus meus, et contestabor te.
Israël, si audieris me,

VULC ¹⁰ non erit in te deus recens,
neque adorabis deum alienum.

VULC ¹¹ Ego enim sum Dominus Deus tuus,
qui eduxi te de terra Ægypti.
Dilata os tuum, et implebo illud.

VULC ¹² Et non audivit populus meus vocem meam,
et Israël non intendit mihi.

VULC ¹³ Et dimisi eos secundum desideria cordis eorum ;
ibunt in adinventionibus suis.

VULC ¹⁴ Si populus meus audisset me,
Israël si in viis meis ambulasset,

VULC ¹⁵ pro nihilo forsitan inimicos eorum humiliassem,
et super tribulantes eos misissem manum meam.

VULC ¹⁶ Inimici Domini mentiti sunt ei,
et erit tempus eorum in sæcula.

VULC ¹⁷ Et cibavit eos ex adipe frumenti,
et de petra melle saturavit eos.]