VULC ¹ In finem, pro torcularibus filiis Core. Psalmus.

VULC ² [Quam dilecta tabernacula tua, Domine virtutum !

VULC ³ Concupiscit, et deficit anima mea in atria Domini ;
cor meum et caro mea exsultaverunt in Deum vivum.

VULC ⁴ Etenim passer invenit sibi domum,
et turtur nidum sibi, ubi ponat pullos suos :
altaria tua, Domine virtutum,
rex meus, et Deus meus.

VULC ⁵ Beati qui habitant in domo tua, Domine ;
in sæcula sæculorum laudabunt te.

VULC ⁶ Beatus vir cujus est auxilium abs te :
ascensiones in corde suo disposuit,

VULC ⁷ in valle lacrimarum, in loco quem posuit.

VULC ⁸ Etenim benedictionem dabit legislator ;
ibunt de virtute in virtutem :
videbitur Deus deorum in Sion.

VULC ⁹ Domine Deus virtutum, exaudi orationem meam ;
auribus percipe, Deus Jacob.

VULC ¹⁰ Protector noster, aspice, Deus,
et respice in faciem christi tui.

VULC ¹¹ Quia melior est dies una in atriis tuis super millia ;
elegi abjectus esse in domo Dei mei
magis quam habitare in tabernaculis peccatorum.

VULC ¹² Quia misericordiam et veritatem diligit Deus :
gratiam et gloriam dabit Dominus.

VULC ¹³ Non privabit bonis eos qui ambulant in innocentia :
Domine virtutum, beatus homo qui sperat in te.]