VULC ¹ Psalmus cantici, in die sabbati.

VULC ² [Bonum est confiteri Domino,
et psallere nomini tuo, Altissime :

VULC ³ ad annuntiandum mane misericordiam tuam,
et veritatem tuam per noctem,

VULC ⁴ in decachordo, psalterio ;
cum cantico, in cithara.

VULC ⁵ Quia delectasti me, Domine, in factura tua ;
et in operibus manuum tuarum exsultabo.

VULC ⁶ Quam magnificata sunt opera tua, Domine !
nimis profundæ factæ sunt cogitationes tuæ.

VULC ⁷ Vir insipiens non cognoscet,
et stultus non intelliget hæc.

VULC ⁸ Cum exorti fuerint peccatores sicut fœnum,
et apparuerint omnes qui operantur iniquitatem,
ut intereant in sæculum sæculi :

VULC ⁹ tu autem Altissimus in æternum, Domine.

VULC ¹⁰ Quoniam ecce inimici tui, Domine,
quoniam ecce inimici tui peribunt ;
et dispergentur omnes qui operantur iniquitatem.

VULC ¹¹ Et exaltabitur sicut unicornis cornu meum,
et senectus mea in misericordia uberi.

VULC ¹² Et despexit oculus meus inimicos meos,
et in insurgentibus in me malignantibus audiet auris mea.

VULC ¹³ Justus ut palma florebit ;
sicut cedrus Libani multiplicabitur.

VULC ¹⁴ Plantati in domo Domini,
in atriis domus Dei nostri florebunt.

VULC ¹⁵ Adhuc multiplicabuntur in senecta uberi,
et bene patientes erunt :

VULC ¹⁶ ut annuntient quoniam rectus Dominus Deus noster,
et non est iniquitas in eo.]