Josué 17 (Codex W. Leningrad)

Josué 17

(Codex W. Leningrad)

¹ וַיְהִ֤י הַגּוֹרָל֙ לְמַטֵּ֣ה מְנַשֶּׁ֔ה כִּי־ ה֖וּא בְּכ֣וֹר יוֹסֵ֑ף לְמָכִיר֩ בְּכ֨וֹר מְנַשֶּׁ֜ה אֲבִ֣י הַגִּלְעָ֗ד כִּ֣י ה֤וּא הָיָה֙ אִ֣ישׁ מִלְחָמָ֔ה וַֽיְהִי־ ל֖וֹ הַגִּלְעָ֥ד וְהַבָּשָֽׁן׃ ² וַ֠יְהִי לִבְנֵ֨י מְנַשֶּׁ֥ה הַנּוֹתָרִים֮ לְמִשְׁפְּחֹתָם֒ לִבְנֵ֨י אֲבִיעֶ֜זֶר וְלִבְנֵי־ חֵ֗לֶק וְלִבְנֵ֤י אַשְׂרִיאֵל֙ וְלִבְנֵי־ שֶׁ֔כֶם וְלִבְנֵי־ חֵ֖פֶר וְלִבְנֵ֣י שְׁמִידָ֑ע אֵ֠לֶּה בְּנֵ֨י מְנַשֶּׁ֧ה בֶּן־ יוֹסֵ֛ף הַזְּכָרִ֖ים לְמִשְׁפְּחֹתָֽם׃ ³ וְלִצְלָפְחָד֩ בֶּן־ חֵ֨פֶר בֶּן־ גִּלְעָ֜ד בֶּן־ מָכִ֣יר בֶּן־ מְנַשֶּׁ֗ה לֹא־ הָ֥יוּ ל֛וֹ בָּנִ֖ים כִּ֣י אִם־ בָּנ֑וֹת וְאֵ֙לֶּה֙ שְׁמ֣וֹת בְּנֹתָ֔יו מַחְלָ֣ה וְנֹעָ֔ה חָגְלָ֥ה מִלְכָּ֖ה וְתִרְצָֽה׃ ⁴ וַתִּקְרַ֡בְנָה לִפְנֵי֩ אֶלְעָזָ֨ר הַכֹּהֵ֜ן וְלִפְנֵ֣י ׀ יְהוֹשֻׁ֣עַ בִּן־ נ֗וּן וְלִפְנֵ֤י הַנְּשִׂיאִים֙ לֵאמֹ֔ר יְהוָה֙ צִוָּ֣ה אֶת־ מֹשֶׁ֔ה לָֽתֶת־ לָ֥נוּ נַחֲלָ֖ה בְּת֣וֹךְ אַחֵ֑ינוּ וַיִּתֵּ֨ן לָהֶ֜ם אֶל־ פִּ֤י יְהוָה֙ נַֽחֲלָ֔ה בְּת֖וֹךְ אֲחֵ֥י אֲבִיהֶֽן׃ ⁵ וַיִּפְּל֥וּ חַבְלֵֽי־ מְנַשֶּׁ֖ה עֲשָׂרָ֑ה לְבַ֞ד מֵאֶ֤רֶץ הַגִּלְעָד֙ וְהַבָּשָׁ֔ן אֲשֶׁ֖ר מֵעֵ֥בֶר לַיַּרְדֵּֽן׃ ⁶ כִּ֚י בְּנ֣וֹת מְנַשֶּׁ֔ה נָחֲל֥וּ נַחֲלָ֖ה בְּת֣וֹךְ בָּנָ֑יו וְאֶ֙רֶץ֙ הַגִּלְעָ֔ד הָיְתָ֥ה לִבְנֵֽי־ מְנַשֶּׁ֖ה הַנּֽוֹתָרִֽים׃ ⁷ וַיְהִ֤י גְבוּל־ מְנַשֶּׁה֙ מֵֽאָשֵׁ֔ר הַֽמִּכְמְתָ֔ת אֲשֶׁ֖ר עַל־ פְּנֵ֣י שְׁכֶ֑ם וְהָלַ֤ךְ הַגְּבוּל֙ אֶל־ הַיָּמִ֔ין אֶל־ יֹשְׁבֵ֖י עֵ֥ין תַּפּֽוּחַ׃ ⁸ לִמְנַשֶּׁ֕ה הָיְתָ֖ה אֶ֣רֶץ תַּפּ֑וּחַ וְתַפּ֛וּחַ אֶל־ גְּב֥וּל מְנַשֶּׁ֖ה לִבְנֵ֥י אֶפְרָֽיִם׃ ⁹ וְיָרַ֣ד הַגְּבוּל֩ נַ֨חַל קָנָ֜ה נֶ֣גְבָּה לַנַּ֗חַל עָרִ֤ים הָאֵ֙לֶּה֙ לְאֶפְרַ֔יִם בְּת֖וֹךְ עָרֵ֣י מְנַשֶּׁ֑ה וּגְב֤וּל מְנַשֶּׁה֙ מִצְּפ֣וֹן לַנַּ֔חַל וַיְהִ֥י תֹצְאֹתָ֖יו הַיָּֽמָּה׃ ¹⁰ נֶ֣גְבָּה לְאֶפְרַ֗יִם וְצָפ֙וֹנָה֙ לִמְנַשֶּׁ֔ה וַיְהִ֥י הַיָּ֖ם גְּבוּל֑וֹ וּבְאָשֵׁר֙ יִפְגְּע֣וּן מִצָּפ֔וֹן וּבְיִשָּׂשכָ֖ר מִמִּזְרָֽח׃ ¹¹ וַיְהִ֨י לִמְנַשֶּׁ֜ה בְּיִשָּׂשכָ֣ר וּבְאָשֵׁ֗ר בֵּית־ שְׁאָ֣ן וּ֠בְנוֹתֶיהָ וְיִבְלְעָ֨ם וּבְנוֹתֶ֜יהָ וְֽאֶת־ יֹשְׁבֵ֧י דֹ֣אר וּבְנוֹתֶ֗יהָ וְיֹשְׁבֵ֤י עֵֽין־ דֹּר֙ וּבְנֹתֶ֔יהָ וְיֹשְׁבֵ֤י תַעְנַךְ֙ וּבְנֹתֶ֔יהָ וְיֹשְׁבֵ֥י מְגִדּ֖וֹ וּבְנוֹתֶ֑יהָ שְׁלֹ֖שֶׁת הַנָּֽפֶת׃ ¹² וְלֹ֤א יָכְלוּ֙ בְּנֵ֣י מְנַשֶּׁ֔ה לְהוֹרִ֖ישׁ אֶת־ הֶֽעָרִ֣ים הָאֵ֑לֶּה וַיּ֙וֹאֶל֙ הַֽכְּנַעֲנִ֔י לָשֶׁ֖בֶת בָּאָ֥רֶץ הַזֹּֽאת׃ ¹³ וַֽיְהִ֗י כִּ֤י חָֽזְקוּ֙ בְּנֵ֣י יִשְׂרָאֵ֔ל וַיִּתְּנ֥וּ אֶת־ הַֽכְּנַעֲנִ֖י לָמַ֑ס וְהוֹרֵ֖שׁ לֹ֥א הוֹרִישֽׁוֹ׃ ¹⁴ וַֽיְדַבְּרוּ֙ בְּנֵ֣י יוֹסֵ֔ף אֶת־ יְהוֹשֻׁ֖עַ לֵאמֹ֑ר מַדּוּעַ֩ נָתַ֨תָּה לִּ֜י נַחֲלָ֗ה גּוֹרָ֤ל אֶחָד֙ וְחֶ֣בֶל אֶחָ֔ד וַֽאֲנִ֣י עַם־ רָ֔ב עַ֥ד אֲשֶׁר־ עַד־ כֹּ֖ה בֵּֽרְכַ֥נִי יְהוָֽה׃ ¹⁵ וַיֹּ֨אמֶר אֲלֵיהֶ֜ם יְהוֹשֻׁ֗עַ אִם־ עַם־ רַ֤ב אַתָּה֙ עֲלֵ֣ה לְךָ֣ הַיַּ֔עְרָה וּבֵרֵאתָ֤ לְךָ֙ שָׁ֔ם בְּאֶ֥רֶץ הַפְּרִזִּ֖י וְהָֽרְפָאִ֑ים כִּֽי־ אָ֥ץ לְךָ֖ הַר־ אֶפְרָֽיִם׃ ¹⁶ וַיֹּֽאמְרוּ֙ בְּנֵ֣י יוֹסֵ֔ף לֹֽא־ יִמָּ֥צֵא לָ֖נוּ הָהָ֑ר וְרֶ֣כֶב בַּרְזֶ֗ל בְּכָל־ הַֽכְּנַעֲנִי֙ הַיֹּשֵׁ֣ב בְּאֶֽרֶץ־ הָעֵ֔מֶק לַֽאֲשֶׁ֤ר בְּבֵית־ שְׁאָן֙ וּבְנוֹתֶ֔יהָ וְלַֽאֲשֶׁ֖ר בְּעֵ֥מֶק יִזְרְעֶֽאל׃ ¹⁷ וַיֹּ֤אמֶר יְהוֹשֻׁ֙עַ֙ אֶל־ בֵּ֣ית יוֹסֵ֔ף לְאֶפְרַ֥יִם וְלִמְנַשֶּׁ֖ה לֵאמֹ֑ר עַם־ רַ֣ב אַתָּ֗ה וְכֹ֤חַ גָּדוֹל֙ לָ֔ךְ לֹֽא־ יִהְיֶ֥ה לְךָ֖ גּוֹרָ֥ל אֶחָֽד׃ ¹⁸ כִּ֣י הַ֤ר יִֽהְיֶה־ לָּךְ֙ כִּֽי־ יַ֣עַר ה֔וּא וּבֵ֣רֵאת֔וֹ וְהָיָ֥ה לְךָ֖ תֹּֽצְאֹתָ֑יו כִּֽי־ תוֹרִ֣ישׁ אֶת־ הַֽכְּנַעֲנִ֗י כִּ֣י רֶ֤כֶב בַּרְזֶל֙ ל֔וֹ כִּ֥י חָזָ֖ק הֽוּא׃

Références croisées

17:1 Gn 41:51, Gn 46:20, Gn 48:18, Dt 21:17, Gn 50:23, Nb 26:29, Nb 27:1, Nb 32:39-40, Jg 5:14, 1Ch 2:23, 1Ch 7:14-15, Nb 26:29, Nb 32:33, Nb 32:40, Dt 3:13-15
Réciproques : Nb 1:34, Nb 33:54, Dt 3:15, Js 22:7, Jg 20:1, 2S 17:26, 1Ch 12:31, Ps 60:7, Ez 48:4
17:2 Nb 26:29-32, Jg 6:11, Jg 8:2, 1Ch 7:18, Nb 26:30, Nb 26:31, Nb 26:32
Réciproques : Nb 36:1, Js 17:5, Jg 6:34, 1R 4:10
17:3 Nb 26:33, Nb 27:1, Nb 36:2-11
Réciproques : Nb 36:1, Js 17:5
17:4 Js 14:1, Nb 34:17-29, Nb 27:6-7, Ga 3:28
Réciproques : Nb 27:4, Js 21:1
17:5 Js 17:2-3, Js 17:14, Js 13:29-31, Nb 32:30-42
Réciproques : Ps 60:7
17:6 Réciproques : Ps 60:7
17:7 Js 16:6-8, Js 20:7, Js 21:21, Js 24:1, Js 24:32, Gn 34:2, Gn 37:12, Gn 37:14, Jg 9:1, 1R 12:1, 1R 12:25, 1Ch 6:67
Réciproques : 1Ch 7:29, Ps 108:7
17:8 Js 12:17, Js 15:34, Js 15:53, Js 16:8
Réciproques : Ez 48:5
17:9 Js 16:8, Js 16:9, Js 16:3, Js 16:8, Js 19:29
17:11 Js 16:9, 1Ch 7:29, 1Ch 12:29, 1S 31:10, 1S 31:12, 1R 4:12, 2R 9:27, 1Ch 6:70, Js 12:23, Jg 1:27, 1R 4:11, 1S 28:7, Ps 83:10, Js 12:21, Jg 5:19, Jg 1:27, Jg 5:19, 1R 4:12, 1R 9:15, 2R 9:27, 2R 23:29-30, 2Ch 35:22, Za 12:11
Réciproques : Js 11:2, Js 17:16, Js 21:25, 2S 21:12
17:12 Js 15:63, Js 16:10, Ex 23:29-33, Nb 33:52-56, Jg 1:27-28, Rm 6:12-14
Réciproques : Js 5:1, 1R 9:21, Ps 106:34
17:13 Jg 1:28, 2S 3:1, Ep 6:10, Ph 4:13, 2P 3:18, Js 16:10, Dt 20:11-18, Jg 1:30, Jg 1:33, Jg 1:35, 2Ch 8:7-8
Réciproques : Ex 23:29
17:14 Gn 48:22, Nb 26:34-37, Dt 33:13-17, Gn 48:19, Gn 49:22-26
Réciproques : Nb 26:54, Nb 26:55, Js 16:4, Js 17:5, Js 17:17, Jg 17:1, 2R 6:1, 1Ch 4:10, Es 49:20, Ez 48:5, 2Tm 3:12
17:15 Lc 12:48, Gn 13:7, Ex 33:2, Esd 9:1, Gn 14:5, Gn 15:20, 2S 5:18, 2S 5:22
Réciproques : Js 17:18, Jg 3:27, Jg 18:2, 2S 18:6, 2Ch 19:4, Jr 4:15, Jr 50:19
17:16 Js 17:18, Jg 1:19, Jg 4:3, Js 17:11, 1R 4:12, Js 19:18, Jg 6:33, 1R 4:12, 1R 18:46, 1R 21:1, 1R 21:23, 2R 9:10, 2R 9:37, Os 1:4-5
Réciproques : Ex 14:7, Dt 7:17, 1R 9:21, Ps 78:9
17:17 Js 17:14
Réciproques : Gn 48:16
17:18 Js 17:15, Js 15:9, Js 20:7, Js 11:4-6, Js 13:6, Nb 14:6-9, Dt 20:1-4, Ps 27:1-2, Es 41:10-16, Es 51:12-13, Rm 8:31, Rm 8:37, He 13:6
Réciproques : Gn 48:5, Js 5:1, Js 17:16, Js 18:5, Jg 3:27, 2S 18:6, 1Ch 7:29

Notes de la Bible Codex W. Leningrad

A savoir : les notes ne font PAS partie du texte biblique. Plus d'informations
Josué 17

17.17 We read one or more consonants in L differently from BHQ.