VULC ¹ [Ecce in justitia regnabit rex,
et principes in judicio præerunt.

VULC ² Et erit vir sicut qui absconditur a vento,
et celat se a tempestate ;
sicut rivi aquarum in siti,
et umbra petræ prominentis in terra deserta.

VULC ³ Non caligabunt oculi videntium,
et aures audientium diligenter auscultabunt.

VULC ⁴ Et cor stultorum intelliget scientiam,
et lingua balborum velociter loquetur et plane.

VULC ⁵ Non vocabitur ultra is qui insipiens est, princeps,
neque fraudulentus appellabitur major ;

VULC ⁶ stultus enim fatua loquetur,
et cor ejus faciet iniquitatem,
ut perficiat simulationem,
et loquatur ad Dominum fraudulenter,
et vacuam faciat animam esurientis,
et potum sitienti auferat.

VULC ⁷ Fraudulenti vasa pessima sunt ;
ipse enim cogitationes concinnavit
ad perdendos mites in sermone mendacii,
cum loqueretur pauper judicium.

VULC ⁸ Princeps vero ea quæ digna sunt principe cogitabit,
et ipse super duces stabit.]

VULC ⁹ [Mulieres opulentæ, surgite,
et audite vocem meam ;
filiæ confidentes,
percipite auribus eloquium meum.

VULC ¹⁰ Post dies enim et annum,
vos conturbabimini confidentes ;
consummata est enim vindemia,
collectio ultra non veniet.

VULC ¹¹ Obstupescite, opulentæ ;
conturbamini, confidentes :
exuite vos et confundimini ;
accingite lumbos vestros.

VULC ¹² Super ubera plangite,
super regione desiderabili,
super vinea fertili.

VULC ¹³ Super humum populi mei
spinæ et vepres ascendent :
quanto magis super omnes domos gaudii
civitatis exsultantis !

VULC ¹⁴ Domus enim dimissa est,
multitudo urbis relicta est,
tenebræ et palpatio
factæ sunt super speluncas usque in æternum ;
gaudium onagrorum,
pascua gregum.

VULC ¹⁵ Donec effundatur super nos
spiritus de excelso,
et erit desertum in carmel,
et carmel in saltum reputabitur.

VULC ¹⁶ Et habitabit in solitudine judicium,
et justitia in carmel sedebit.

VULC ¹⁷ Et erit opus justitiæ pax,
et cultus justitiæ silentium,
et securitas usque in sempiternum.

VULC ¹⁸ Et sedebit populus meus in pulchritudine pacis,
et in tabernaculis fiduciæ,
et in requie opulenta.

VULC ¹⁹ Grando autem in descensione saltus,
et humilitate humiliabitur civitas.

VULC ²⁰ Beati qui seminatis super omnes aquas,
immittentes pedem bovis et asini.]